VOV4.Bahnar - Jang kiơ̆ nơ̆r krao hơ vơn đĭ đăng kon pơ lei tơ lĕch jơ hngơ̆m tang găn jĭ Covid-19, hơ dai hăm lơ̆m teh đak, kon pơ lei tơ̆ Dak Lak kŭm tŏk bŏk hơ drin tơ gop jên, tơ gŭm jên mong vắc xin păng rim tơ drong jang tang găn jĭ. Lơ khŭl jang, anih jang mơ dro sa păng kon pơ lei, mă đơ̆ng oei tŏk bŏk athei tơ jră hăm dôm mơ mat tat lơ̆m pơm tơ lĕch, tĕch mơ dro păng tơ drong arih sa mă lei oei khŏm vang tơ gop jơ hngơ̆m bơ ngai, mŭk drăm yua kơ tơ pôl.

Sơ năm kră păng ư̆h kơ băt yua điên thoăi hơ gei, ƀok Y Tuaih Niê, bơ ngai Ê đê, oei tơ̆ phường Ea Tam, pơ lei tơm Buôn Ma Thuột, dêh char Dak Lak hlôi athei kon drŏ kăn pơ tho vă gơ̆ih jên tơ gŭm jên mong răt vắc-xin bơ̆ng jĭ Covid-19. Ƀok Y Tuaih tơ roi, hơ len lăng tơ roi lơ̆m hla ar chih kơ tơ̆ng ang, sư hlôi ƀôh tơ drong krê hơ mơt đơ̆ng jĭ hơ buh păng tơ drong gleh hrat đơ̆ng dôm đe y ƀak si tơ̆ hơ nih tang găn jĭ. Sư kŭm ‘meh tơ gop tŏ sĕt vă hơ dai hăm lơ̆m teh đak tang găn jĭ covid-19:

            Tơ gop jên mong răt vắc-xin tang găn jĭ covid-19 ‘noh ĭnh tôch kơ hôn bơ nê păng tơ gŭm. Yua kơ lơ̆m noh kŭm gĭt kăl ‘noh jĭ vă vei lăng jơ hngơ̆m jăn păng tang găn jĭ covid.

Ư̆h khan lăp nhăn tin tơ gŭm kiơ̆ lơ̆m điên thoăi, ƀok Phan Quang Vũ, Phŏ kơ dră vei lăng kŏng ti jang găh dơ nâu mong đak Buôn Đôn, tơ băt, jang kiơ̆ nơ̆r krao hơ vơn đơ̆ng Anih jang mặt trận tổ quốc Việt Nam dêh char Dak Lak, kŏng ti hlôi tơ lĕch ăn pơ đĭ kang ƀô̆ kŏng nhân bơ ngai jang vang tơ gop, hơ vơn đei 50 triệu hlak jên vă tơ gŭm tang găn jĭ.

 Jang kiơ̆ tơ drong krao hơ vơn đĭ đăng lơ̆m teh đak vang tơ gŭm tang găn jĭ Covid-19 ‘noh kŏng ti kŭm hlôi tơ lĕch jang 1 ‘nu kang ƀô̆ kŏng nhân bơ ngai jang tŏ sĕt hloh 1 năr jên khei, păng hơ drô̆ kŏng ti đei iŏk đơ̆ng jên mong đei yua păng jên hơ drô̆ đơ̆ng kŏng ti. Jơ hngơ̆m đon kang ƀô̆, bơ ngai jang tôch kơ tơ gŭm tơ drong tơ gop âu, đei lơ bơ ngai chă tơ gop kơ dih dơ̆ng tơ̆ ‘ngoăih tơ drong hơ găt đơ̆ng kŏng ti. Kŭm ‘meh jĭ hơ buh jăh hlôi, rim ‘nu đei đon băt kơ dih vă jăh yak hloh đơ̆ng jĭ hơ buh âu.

Lơ bơ ngai, khŭl jang păng naih jang mơ dro sa vang tơ gŭm jên mong răt vắc xin păng tơ mam tang găn jĭ dêh char Dak Lak

Oei kiơ̆ kơ ƀok Vũ Đình Tân, Kơ dră vei lăng kŏng ti jang ŭnh điên kial  Trung Nam Dak Lak, ư̆h khan lăp tơ gop lơ̆m jên mong răt vắc-xin, khŭl kơ dră chĕp kơ̆l Grŭp jang hlôi athei rim anih jang lơ̆m khŭl hơ drin tơ gŭm tơ drong jang tang găn jĭ hơ buh tơ̆ rim tơ ring tŏk bŏk tơ lĕch jang tơ drong jang. Hơ drô̆ tơ̆ Dak Lak, grŭp jang hlôi tơ gop 1 ti hlak jên vă tơ gŭm jên răt vắc-xin păng tơ mam tang găn jĭ.

            Hăm Khŭl kơ dră teh đak ‘noh âu ki Grŭp jang Trung Nam kŭm hlôi tơ gŭm ăn Khŭl kơ dră teh đak 1 triệu đô lar Mi găh vắc-xin tang găn jĭ covid-19. Oei hăm dêh char ‘noh dang ei, Grŭp jang kŭm đei athei ăn rim kŏng ti jang lơ̆m khŭl ‘noh kŭm athei đei hơ năp jang tơ năp,‘ngoăih kơ tơ gŭm vắc-xin ‘noh kŏng ti gô hơ nơ̆ng tơ gŭm.

Ư̆h khan lăp tơ gop jên mong răt vắc xin, lơ anih jang oei vang tơ gop lơ̆m tơ drong jang tang ăn jĭ tơ̆ tơ ring

            Kiơ̆ kơ ƀok Lê Xuân Sương, Phŏ Kơ dră chĕp kơ̆l pơ gơ̆r Anih jang mặt trận tổ quốc Việt Nam dêh char Dak Lak, lăp đơ̆ng rŏng 1 giĕng gơ̆ih kơ thơ krao hơ vơn tơ lĕch jang tang găn jĭ Covid-19, anih jang hlôi sơng iŏk hloh 5,1 ti hlak jên đơ̆ng rim khŭl jang, kơ dih păng anih jang mơ dro sa tơ gop, tơ gŭm. Đơ̆ng jên tơ gop âu dêh char gô đei trong tơ lĕch jang klăih song răt vắc-xin, tơ mam tơ gŭm anih tang găn jĭ.

Ƀơ̆t tơ lĕch jang rim ‘măng pơ ma atŭm đei tơ drong vang jang tôch kơ ‘lơ̆ng. Mă akhan lơ̆m tơ drong jĭ hơ buh tĕch mơ dro tôch kơ mơ mat tat mă lei hăm jơ hngơ̆m đon yua kơ tơ pôl, rim bơ ngai jang mơ dro sa, anih mong jên, rim bơ ngai đei jơ hngơ̆m đon ‘lơ̆ng păng dôm ŭnh hnam tĕch mơ dro tơ gop găh jên kŭm nhen găh tơ mam drăm. ‘Ngoăih kơ ‘noh rim răih kon pơ lei, lơ bơ ngai đe sư tôch kơ dơ nuh mă lei đe sư oei tơ lĕch ăn tŏ sĕt jên hơ yơ ‘noh lơ̆m ŭnh hnam vă gơ̆ih truh tơ ring jĭ, ƀơ̆t lăp ư̆h kơ đei jên ‘noh đe sư gơ̆ih truh bơ̆n tơ mam.

Lơ̆m ‘măng jĭ âu, dêh char Dak Lak hlôi đei 4 ‘nu jĭ covid-19. Mă đơ̆ng athei tơ jră hăm dôm mơ mat tat yua đơ̆ng ƀơm kơ nê̆ đơ̆ng jĭ hơ buh, mă lei kon pơ lei, tơ pôl păng anih jang mơ dro sa tơ̆ tơ ring âu vang tơ gŭm 1 jơ hngơ̆m đon tơ gop jăh tang găn jĭ hơ buh.

H’Xíu H’Móc: Chih

Thuem: Tơ blơ̆