VOV4.Bahnar - Hăm hloh 260 ‘nu jĭ COVID -19 đei chih iŏk lăp lơ̆m khei ‘năr kơ đeh, apŭng Krông Búk jĭ tơ ring đei kơ sô̆ bơ ngai jĭ COVID –19 lơ hloh dêh char Dak Lak. Dôm bơ ngai jĭ âu găh lơ ƀơm truh hơ nih jĭ tơ̆ plei Drao, xăh Cư Né. Tơ drong tơm pơm ăn ‘noh jĭ yua kon pơ lei ưh kơ pơm kiơ̆ tơ drong pơ kăp 5K lơ̆m tang găn jĭ hơ buh. Dang ei Krông Buk tŏk bŏk hơ tŏk hrĕnh hơ len lăng, rơ̆ih tơ klăh đĭ dôm bơ ngai jĭ lơ̆m tơ pôl păng dăr hơ len kơ jăp kŭm hăm tơ gŭm kon pơ lei sơ đơ̆ng pơm kiơ̆ ưh kơ ăn yak vih vơ̆t lơ̆m tơ pôl, tơ gop jăh tang găn đĭ ji hơ buh.

Năm hơ lơ̆k dơ̆ng tơ̆ plei Drao, xăh Cư Né, apŭng Krông Búk ‘măng mă 2, nhôn ƀôh hơ dăh tơ drong pơ ‘lơ̆ng ƀơ̆t sơng pơ ma dơ nuh hăm bơ ngai hlĭch, tơ drong tơ tăm găh jĭ hơ buh kiơ̆ rim muh măt đơ̆ng kon pơ lei tơ̆ hơ nih iŏk đak muh hơ len lăng hrĕnh jĭ COVID -19. Jum dăr hơ nih iŏk đak muh âu, lơ hnam kơ jung khoă ‘măng rơ heng kơ kot, păh cheng hnam tơm pro har đĭ đum đĭ, hơ drơ̆l tơ yĕn pơ kao mă lei ưh kơ đei bơ ngai phĕ. Yua kơ tơ ‘ngla lu sư tă kơ dôm F0 hlôi ăn ba năm hơ met jĭ COVID -19 ngăl bơ̆ih.

Ƀok Y Krú Ayun, phŏ Bí thư Chi bộ, Kơ dră Khŭl bơ̆ jang Mặt trận plei Drao tơ băt, 155 F0, hăm hloh 300 F1, đei vă jê̆ 1/3 kơ sô̆ kon pơ lei athei năm hơ met păng ăn oei hơ drô̆ ‘noh jĭ tơ drong mă ưh kơ đei bu ‘meh vă. Tơ drong tơm đơ̆ng tơ drong tơ poh đei ƀôh đơ̆ng tơ drong 1,2 ‘nu bơ ngai pơ gơ̆r et sa păng hơ vơn kon pơ lei, kueng ƀôt vang et sa hơ dai. Dôm năr âu ki, rim khŭl grŭp lơ̆m pơ lei jang hơ dai hăm khŭl iung jang, grŭp COVID tơ pôl kơ tă năm truh tơ̆ rim hnam krao hơ vơn kon pơ lei ‘nĕ kơ akŏm lơ bơ ngai, pơm kiơ̆ tơ păt 5K vă tang găn jĭ hơ buh. Hăm trong jang kăl “ ‘mi hngach ‘yôm đunh”, vă đĭ đăng kon pơ lei lơ̆m pơ lei hlôi hlôh păng pơm kiơ̆ tơ păt:

“Dang ei kiơ̆ găh tơ drong joăt oei sa đơ̆ng nhôn pơ đĭ pơ lei, pơ đĭ apŭng, pơ đĭ xăh pơ têng hăm hơ drol ki ‘noh jĭ ưh kơ gơh bơ̆ih. Hơ drol ki ‘noh pha, dang ei ‘noh pha yua kơ tŏk bŏk jĭ hơ buh thoi âu. Tang găn jĭ, tơ dăh mă đei lôch âu to ‘noh tang găn đĭ, ưh pă nhen hơ drol sơ̆ ôh. Iŏk đơ̆ng đei ƀôh tơ drong jĭ ‘nâu, kon pơ lei bơ ngơ̆t hli văi, kon pơ lei pơm kiơ̆ tơ păt hloi.”

Ƀok Ykrú Ayun tŏk bŏk tơ roi tơ băt ăn kon pơ lei pơm kiơ̆ ƀlep nơ̆r pơ kăp 5k vă tang găn jĭ COVID 19

Ƀok Trần Thuận, Kơ dră Anih vei lăng hnam pơ gang apŭng Krông Búk tơ băt, lơ̆m 2 giĕng âu ki khŭl jang pơ gang hlôi hơ drin pơ̆ih să tơ chă păng hơ len lăng lơ̆m tơ pôl ‘măng mă 1. Kiơ̆ kơ noh, hlôi hơ len lăng hloh 6.000 ‘nu kon pơ lei tơ̆ dôm pơ lei kơ xăh Cư Né păng Cư Kpô. Lơ̆m khei ‘năr tŏk bŏk pơ vang găn 1,2 pơ lei păng lơ̆m apŭng tŏk bŏk pơm kiơ̆ tơ drong tơ chơ̆t 16 đơ̆ng Thủ tướng teh đak, anih jang găh pơ gang jang hơ dai hăm rim khŭl jang dăr hơ len dôm hơ nih kon pơ lei oei “ kơ jăp lơ̆m kơ jăp ‘ngoăih”, păng hơ nơ̆ng iŏk đak muh hơ len lăng ‘măng mă 2 tơ̆ dôm tơ ring tơm găh jĭ. Kơ plăh iŏk đak muh gô jô̆ hơ năn rim ŭnh hnam, ưh kơ gơh lê̆ lon 1 ‘nu hơ yơ vă rơ̆ih tơ klăh F0 lĕch đơ̆ng tơ pôl.

Ƀok Trần Thuận, tơ băt, dang ei apŭng Krông Búk tŏk bŏk pơ jing trong jang test hrĕnh SARS-CoV-2 ăn đĭ đăng kon pơ lei, lơ̆m noh tơ gŭm hơ drol bơ̆ jang hrôih hăm dang 4.000 ‘nu kon pơ lei tơ̆ tơ ring găh tu kơ apŭng, hơ nih oei tŏk bŏk 2 xăh đei jĭ:

“Dang ei găh tu kơ apŭng Krông Búk tŏk bŏk oei hơ lam đơ̆ng 2 tơ ring jĭ ‘noh Ea Nam păng xăh Cư Né păng dang ei đei 1,2 ‘nu kon pơ lei oei hơ lam lơ̆m tơ ring ‘noh tam mă đei bơ ngai jĭ. Rŏ lăng 1 năr hơ yơ ‘noh đĕch ‘noh lơ̆m tơ drong mơ̆t lĕch đơ̆ng plei ‘nâu, păng xăh ‘nâu xăh nai ‘noh nhôn tơ gŭm hơ drol test hrĕnh lơ̆m tơ pôl ‘noh gô chă ƀôh lơ̆m tơ pôl gô ‘lơ̆ng hloh.”

Jô̆ truh dang ei, apŭng Krông Búk hlôi đei hloh 260 ‘nu ƀôh jĭ hăm SARS-CoV-2. Lơ̆m noh, kăl kơ lăng truh ‘noh jĭ 2 hơ nih bơ ngai jĭ tơ̆ xăh Cư Né păng xăh Cư Kpô. Hơ drô̆ tơ̆ xăh Cư Né hlôi đei truh 202 F0, găh lơ akŏm tơ̆ plei Drao păng plei Ktơng Drun. Kiơ̆ kơ ƀok Hoàng Kiên Cường, Kơ dră Anih vei lăng kon pơ lei apŭng Krông Búk, tơ̆ hơ năp dôm tơ drong đei ƀôh krê hơ mơt đơ̆ng jĭ COVID -19, apŭng hlôi athei rim khŭl jang, grŭp tơ pôl, khŭl kơ dră tơ ring kŭm hăm tơ drong vei kơ jăp dôm trong jang dăr lăng, chĕng gơ var tơ ring dôm hơ nih jĭ athei pơ lung, băt hơ dăh jơ hngơ̆m đon tơ chĕng đơ̆ng kon pơ lei păng tơ gŭm phe tơ mam sa tơ tom vă kon pơ lei sơ đơ̆ng pơm kiơ̆ dôm trong ăn oei hơ drô̆. Kŭm hăm ‘noh, apŭng pơ gơ̆r grŭp bơ̆ jang tơ gŭm kon pơ lei tĕch tơ mam đơ̆ng choh jang sa đei nhen ƀơ, sầu riêng lơ̆m pơ yan jĭ. Apŭng kŭm ăn phep ŭnh hnam tĕch mơ dro ăn bơ ngai năm răt tơ mam đơ̆ng choh jang sa đơ̆ng kon pơ lei, mă lei athei đei hla ar hơ len lăng ư̆h kơ đei jĭ hăm SARS-CoV-2.

Bơ ngai jang pơ gang iŏk đak muh hơ len lăng hrĕnh ‘măng mă 2 ăn kon pơ lei plei Drao

Găh dôm trong jang vă tang găn jĭ COVID -19, ƀok Hoàng Kiên Cường tơ băt:

 “Apŭng gô hơ tŏk loi dơ̆ng dôm trong jang tơ roi tơ băt, mă 2 ‘noh hơ tŏk loi dơ̆ng dăr joang vei lăng, mă 3 ‘noh ăn kang ƀô̆ vei kơ jăp rim pơ lei pơ la vă pơm liơ vang hơ dai hăm rim khŭl jang đơ̆ng xăh păng đơ̆ng pơ đĭ hloi khŭl jang chinh trĭ vă jang ‘lơ̆ng tơ drong jang vei lăng kơ jăp kon pơ lei vă vei sơ đơ̆ng bu oei tơ̆ yơ ‘noh oei dơ nơ̆ng tơ̆ noh vă tơ drong jang tang găn jĭ kơ apŭng iŏk đei jơ nei ‘lơ̆ng hloh.”

Kŭm hăm tơ drong lăp đon đơ̆ng kon pơ lei, dôm tơ drong hơ drin đơ̆ng anih jang pơ gang păng tơ drong mơ̆t jang kơ tang đơ̆ng khŭl kơ dră tơ ring, hơ mĕng akhan apŭng Krông Búk gô jăh tang găn đei jĭ hơ buh COVID -19, hơ nhăk ăn tơ drong arih sơ đơ̆ng ăn kon pơ lei.

            Nam Trang: Chih

Thuem: Tơ blơ̆