Kŭm hăm lơ tơ ring lơ̆m teh đak, dêh char Dak Lak tŏkb ŏk hơ drin tŭn hrĕnh tơ drong jang ƀet vắc xin bơ̆ng jĭ Covid-19 ƀơ̆t mă đei ƀôh jĭ tơ̆ tơ ring tôch krê hơ mơt. Mă loi ‘noh, tơ drong ƀet vắc xin tŏk bŏk đei hơ tŏk loi dơ̆ng ăn rim pơ lei pơ la kon kông, hơ nih bơ̆ jang tang găn jĭ oei tam mă ‘lơ̆ng păng đei ƀôh lơ hơ nih jĭ lơ̆m tơ pôl.

‘Nao đei ƀet đang jrŭm mă 2 vắc xin bơ̆ng jĭ Covid-19, ‘nhŏng Y Dhuen Buôn Krông, bơ ngai Ê Đê, oei tơ̆ plei Ea M’dhar, xăh Ea Nuôl, apŭng Buôn Đôn, dêh char Dak Lak chhôk hơ iă tơ băt, ‘nâu đĭ ‘măng ƀet vắc xin mă 2 pơ gơ̆r ăn pơ lei. Truh dang ei, vă đĭ đăng bơ ngai ‘lŏ lơ̆m pơ lei tă kơ hlôi đei ƀet vắc xin, đơ̆ng dang ei tơ drong hli tơ tăm kơ jĭ Covid-19 gô dă ƀiơ̆ ƀiơ̆ bơ̆ih, rim bơ ngai gô sơ đơ̆ng jang sa:

Đơ̆ng rŏng kơ ƀet vaccine, đơ̆ng ‘năr brei truh năr ‘nâu, ĭnh ƀôh lơ̆m hơ kâu pran dêh, ưh kơ đei jĭ, ĭnh tôch sơ đơ̆ng, ưh kơ hli tơ tăm kiơ hloi. Ĭnh kŭm apĭnh bơ nê kơ Đảng, teh đak hlôi bơ ngơ̆t truh, pơm tơ drong hiôk ăn đĭ đăng kon pơ lei gơ̆h năm ƀet vaccine, ĭnh kŭm ‘meh tơ tă truh mih ma duch nă athei năm ƀet vaccine, ƀet vă vei lăng kơ dih kâu bơ̆n, ưh kơ đei răm kiơ ôh. .

Yă H Pôly Ê Ban, Phŏ pơ gơ̆r Plei Ko Đung B, xăh Ea Nuôl, apŭng Buôn Đôn, tơ băt, đơ̆ng rŏng 4 ‘măng khŭl kơ dră păng anih jang pơ gang pơ gơ̆r ƀet vắc xin bơ̆ng jĭ Covid-19 tơ̆ tơ ring hlôi tơgŭm vă jê̆ pơ đĭ 700 ‘nu kơ pal kơ 18 sơ năm lơ̆m pơ lei tă kơ hlôi đei ƀet vắc xin ngăl bơ̆ih. Kiơ̆ kơ yă H Pôly, blŭng a kon pơ lei oei ưh kơ pơ̆n, hli tơ tăm lơ̆m tơ drong ƀet vắc xin păng khŭl kơ dră, anih jang pơ gang hlôi hơ drin krao hơ vơn, tơ roi tơ băt, tơ gŭm kon pơ lei hlôi hlôh vao đei tơ drong đei yua đơ̆ng tơ drong ƀet vắc xin. Kiơ̆ đơ̆ng noh, roi dôm ‘măng ƀet vắc xin đơ̆ng rŏng ‘noh roi hơ drin jang kiơ̆:

Kon pơ lei tơ̆ pơ lei pơ la tôch kơ chhôk ƀơ̆t đei năr gơh năm ƀet vaccine, kon pơ lei chhôk dêh, đei năr ‘noh kon pơ lei năm ƀet đĭ, mă loi ‘noh kon pơ lei đơ̆ng sơ năm 18 tơ̆ kơ pal. Dang ei lơ̆m pơ lei âu hlôi đei ƀet bơ̆ng vă tôm bơ̆ih, rŏ lăng oei pă dang 15% tam mă đei ƀet yua kơ kon pơ lei tŏk bŏk yua pơ gang đei tơ drong jĭ đơ̆ng hơ drol.

Vei lăng 1 ‘măng ƀet vắc xin bơ̆ jĭ Covid-19 tơ̆ pơ lei pơ la, yă Phùng Thị Tý, Phŏ kơ dră vei lăng Hnam pơ gang xăh Ea Nuôl, apŭng Buôn Đôn tơ băt, hơ drol ‘noh hnam pơ gang xăh hlôi jang hơ dai kơ jăp hăm khŭl kơ dră xăh păng khŭl chă vei lăng kơ dih tơ̆ pơ lei pơ la chih hơ năn bơ ngai gơh ƀet, đang kơ ‘noh tơ roi tơ băt jơ̆p jang vă kơ kon pơ lei băt hơ dăh năr ƀet. Khei ‘năr âu tŏk bŏk pơ yan jang kơ kon pơ lei kơ na tơ drong jang ƀet vắc xin kŭm athei đei pơ gơ̆r mă hrĕnh vă vei sơ đơ̆ng tơ drong jang kơ kon pơ lei ưh kơ đei ƀơm ưh kơ ‘lơ̆ng, hmă hmă 1 pơ lei hơ drin ƀet đang lơ̆m 1 năr:

“Mă loi ‘noh jĭ lơ̆m pơ yan jang âu, kon pơ lei lai yơ kŭm hăt hot, ‘meh ƀet đang ‘noh ƀrŏk jang. Trong jang kiơ̆ ‘noh nhôn hơ drin klăih song bơ ngai pơm liơ ‘măng ƀet ‘ngoăih jơ lơ hloh. Pơ tih gia nhen tơ̆ pơ ge nhôn gơh ƀet truh 12 jơ, tơ̆ kơ sơ̆ gơ̆h ƀet truh 6 jơ.”

Ƀok Trịnh Quang Tấn, Kơ dră Anih vei lăng kon pơ lei xăh Ea Nuôl, apŭng Buôn Đôn tơ băt, xăh đei hloh 13.000 ‘nu kon pơ lei, hăm dang 3.900 ‘nu kơ pal kơ 18 sơ năm, kơ sô̆ kon pơ lei kon kông kơ tă anih đei dang 50%. Khŭl kơ dră xăh tôch chhôk hơ iă ƀơ̆t khei ‘năr tơ jê̆ âu kơ sô̆ vắc xin bơ̆ng jĭ Covid-19 đei klăih song ăn lơ, tơ gŭm kon pơ lei ƀet tôm vắc xin tŏk hrĕnh. Dang ei tŏk bŏk jing ‘măng ƀet mă 4 păng đơ̆ng rŏng ‘măng âu, vă đĭ đăng bơ ngai kơ pal kơ 18 sơ năm tơ̆ xăh hlôi đei ƀet vắc xin. Kiơ̆ kơ ƀok Tấn, vă rim ‘măng ƀet tơ̆ pơ lei pơ la đei sơ đơ̆ng, jơ nei păng vei sơ đơ̆ng ‘meh vă tang găn jĭ, xăh hlôi hơ vơn pơ đĭ hloi khŭl jang chĭnh trĭ mơ̆t jang tơ roi tơ băt, krao hơ vơn hai tơ tă ăn kon pơ lei năm ƀet ƀlep năr, vei ƀlep hơ tăih băl, vei sơ đơ̆ng kiơ̆ nơ̆r pơ kăp 5K hai:

            Băng: “Khŭl pơ gơ̆r jang kơ xăh, Khŭl pơ gơ̆r jang kơ apŭng tôch kơ bơ ngơ̆t truh, pơ gơ̆r jang kiơ̆, đang kơ ‘noh tơ jră hrĕnh đơ̆ng pơ lei, tơ roi tơ băt hăm nơ̆r yuan hai, tơ roi tơ băt hăm nơ̆r Ê Đê hai, rim ŭnh hnam ‘noh nhôn kŭm asong hla ar vă rim ŭnh hnam vei sơ đơ̆ng tơ drong jang tang găn jĭ.”

            Công Bắc: Chih

            Thuem: Tơ blơ̆