VOV4.Bahnar - Dêh char Dak Lak tơ chĕng hơ drol gô tơ lĕch 110 ti hlak jên lơ̆m 5 sơ năm truh, vă vei răk păng tơ ƀăk mong kơ jă găp kĭt 1,2 hơ nih gru groa so lơ̆m tơ ring.

Kiơ̆ tơ drong tơ chơ̆t mă Anih vei lăng kon pơ lei dêh char Dak Lak ‘nao tơ lĕch găh Kĭ ăn tơ drong jang vei răk păng tơ ƀăk mong kơ jă kăp gĭt hơ nih grua groa lơ̆m tơ ring truh sơ năm 2030, đei 6 tơ drong jang đei tơ gŭm hơ drol tơ mơ̆t jên jang, ‘noh Hơ nih gru groa gĭt kăl teh đak Hnam pơ nă Buôn Ma Thuột; hơ nih ‘măn răk tơ mam drăm so Dak Lak, Hơ nih gru groa gĭt kăl Hơ nih jang pơ gơ̆r – Hơ nih tơ băt tơ drong tơ chơ̆t pơ jing Quân đoàn 3, Hơ nih jang iung tơ blăh Dak Lak sơ năm 1945, Hơ nih kăn kư̆ tơ blăh vang dêh char Dak Lak jăl jang 1965-1975 păng Hơ nih ‘lơ̆ng chơ kơi đak Drai Nur, kơ chơi đak Dray Sáp Thượng. Tơ drong jang vă lăng truh tơ drong pơ jing rim hơ nih gru groa jing rim hơ nih tơ mang lăng joh ayŏ, rim hơ nih kăl vă pơ tho tơ drong joăt joe iung jang kach mang ăn jơ hnơr mơ lôh; tơ gop vei răk hơ nih gru groa ‘lơ̆ng rŏ.

Thuem: Tơ blơ̆