VOV4.Bahnar - Tơdrong lang să bơngai vang răt yua ƀao hiêm tơpôl lơ̆m apŭng Lăk, dêh char Dak lăk hlôi iŏk đei jơnei hơ iă. Lơ kon pơlei hlôi tơplĭh jơhngơ̆m đon tơchĕng păng hlôi hơlen lăng, răt yua ƀao hiêm tơpôl.

Mŏ Lương Thị Tường Thi đei kang ƀô̆ ƀao hiêm tơpôl apŭng Lăk tơroi tơbăt găh ƀao hiêm tơpôl

Yă Đào Thị Vượng, 66 sơnăm oei tơ̆ koeng kơphô̆ 1, thĭ trân Liên Sơn, apŭng Lăk, sơ̆ ‘nŏh kô pơtho, sơnăm 2010 yă pơdơ̆h pơtho mă lei tim mă tôm tơdrong pơkăp vă đei sa jên khei kơ yuơ oei tim tôm khei ‘năr pơkăp. Đơ̆ng rŏng 5 sơnăm ba ăn ƀao hiêm tơpôl, đơ̆ng sơnăm 2016 trŭh dang ei, rim khei yă đei sa jên khei. Adoi, ‘ngoăih tơdrong đei sa jên khei au yă oei đei ƀơk ăn ƀao hiêm y tê̆ hăm kon jên kla ăn 95% mư̆h năm khăm, ming hơmet jĭ jăn. Yă Vượng tơbăt:“Đơ̆ng mă đei sa jên khei au tơdrong erĭh sa kơ ba mă đei sơđơ̆ng ƀiơ̆, pă đei tơtămlơ̆m sơnăm ‘lŏ kră bơih, ư̆h pă đei gơnang đơ̆ng kôn mon kon sau bơih, mư̆h chă jĭ jăn ‘nŏh đei ƀao hiêm y tê̆ tơgŭm ăn bơih. Tĕh đak lăng ba dôm bơngai ‘lŏ kră ‘nŏh ba ƀô̆h tơdrong jang tơgŭm au ‘lơ̆ng dêh.”

Mŏ Lương Thị Tường Thi, 34 sơnăm, oei tơ̆ tơring Dak Liêng tơbăt: Sơ̆ mŏ jang lơ̆m mĭnh Kŏng ty đe păng đei răt yua ƀao hiêm tơpôl kiơ̆ trong kăl răt iŏk kơna ba ngêh ngăl lăp hơdrô̆ dôm bơngai bơ̆ jang tĕh đak, bơngai jang lơ̆m hơnĭh mơdro sa mă gơ̆h răt yua ƀao hiêm tơpôl. Kiơ̆ đơ̆ng mŏ Thi, tơdrong vang răt ƀao hiêm tơpôl dang ei gô tơgŭm ăn kơ mŏ lơ̆m sơnăm ‘lŏ kră kơnh đei sa jên khei hơnơ̆ng rim khei, sơđơ̆ng tơdrong erĭh sa. “Lăng ƀô̆h đe mĭh ma duch nă sa jên khei ba jei hơpơi ‘mĕh mư̆h ba kră, pă gan pran jăng bơih, ư̆h gơnang lơ̆m kon hơ ‘lơ̆p lơ mă lei ba jei đei tŏ sĕt kon jên răt sa kơ ‘năr. Mă đơ̆ng ma bơngai kon pơlei hmă, ư̆h kơ bơ̆ jang tĕh đak ră mă lei ba jei ‘mĕh vă đei sa jên khei. Tơplĭh ăn kon jên răt sa ‘nŏh ba pơkom tŏ sĕt ‘măn ăn kơ ba ‘lŏ kră kơnh.”

Ƀok Vũ Văn Hải, Kơdră chĕp pơgơ̆r Ƀao hiêm tơpôl apŭng Lăk tơbăt, đơ̆ng blŭng sơnăm trŭh dang ei, apŭng đei 25 ‘nu bơngai vang răt yua ƀao hiêm tơpôl, atŏk măt bơngai vang răt đei trŭh 530 ‘nu bơngai. Kơsô̆ au oei tŏ sĕt pơtêng hăm trong tơlĕch jang. Kiơ̆ đơ̆ng ƀok Hải, vă jang kiơ̆ ‘lơ̆ng bơ̆ jang lang să măt bơngai vang răt yua ƀao hiêm tơpôl, khei năr kơnh, Ƀao hiêm Tơpôl apŭng hơnơ̆ng atŏk kơtang pơrô̆ pơrôp, tơroi tơbăt ăn kon pơlei găh tơdrong đei iŏk yua sa yuơ đơ̆ng răt yua ƀao hiêm tơpôl. Adoi atŏk kơtang bơ̆ jang tơroi tơbăt dôm tơdrong jang tơgŭm djru đơ̆ng ƀao hiêm tơpôl trŭh rim tơring, thĭ trân đei bơngai răt yua tŏ sĕt; iung jang hơdoi kơ jăp hăp rim hơnih bơ̆ jang, rim khŭl jang chĭnh trĭ-tơpôl tơ̆ tơring pơgơ̆r lơ ‘măng hop akŏm au to tơ̆ pơlei pơla ...“Nhôn gô atŏk kơtang bơ̆ jang tơroi tơbăt kon pơlei, mă blŭng kiơ̆ rapor, mă ƀar nhôn pơma dơnŭh kơtă hăm kon pơlei. Nhôn jei tŏk bŏk hơlen đĭ đăng kon pơlei lơ̆m apŭng gơ̆h vang răt yua ƀao hiêm tơpôl, đơ̆ng nŏh nhôn gô pơma dơnŭh hloi hăm lơ trong pơma dơnŭh, pơtĭh gia nhôn pơma tơbăt hloi tơ̆ kơchơ dăh mă tơ̆ Dơnŏ anĭh vei lăng kon pơlei rim tơring.”

Dôm tơdrong hơdrin lang să ƀao hiêm tơpôl tơ̆ apŭng Lăk gô đei iŏk jơnei hơ iă, tơgop yak trŭh trong tơlĕch đunh đai tai sơnăm ‘nŏh đĭ đăng kon pơlei jei đei sa jên khei păng đei vei lăng năng tông jơhngơ̆m jăn ‘lơ̆ng hơ iă mư̆h trŭh sơnăm ‘lŏ kră.

Bơngai chĭh: Nam Trang

Tơblơ̆ nơ̆r: Amazưt