VOV4.Bahnar - Dơ nŏ anih vei lăng kon pơ lei dêh char Dak Lak ‘nao tơ lĕch hla ar chih găh tơ drong jang pơ long năng, asong brŏk đơ̆ng hnam pơ gang hrôih hăm bơ ngai jĭ Covid-19 đei ƀet tôm 2 jrŭm vắcxin păng set hơ len ưh đei pơ rang jĭ. 

Buôn Ma Thuột – Dak Lak oei jang pơ long năng tơ drong hơ met jĭ ăn F0 tơ̆ hnam

Kiơ̆ kơ ‘nŏh, Dơ nŏ anih vei lăng kon pơ lei dêh char asong: đơ̆ng rŏng 7 năr đơ̆ng đei hla ar set hơ len RT-PCR ưh đei pơ rang jĭ tơ̆ anih hơ met jĭ, dôm bơ ngai F0 đĭ ƀet tôm 2 jrŭm vắc xin, gơ̆h asong vih tơ̆ hnam vă hơ met jĭ dơ̆ng. Tơ̆ hơ năp dang ei, tơ drong jang pơ long năng âu đei tơ lĕch tơ̆ dôm tơ ring hlôi vei lăng, hơ met ăn F0 tơ̆ hnam, păng lăp pơm kiơ̆ hăm dôm bơ ngai F0 ưh đei hiĕn, yuh kiơ đĕch. Dơ nŏ anih vei lăng kon pơ lei dêh char pơ jao ăn Anih vei lăng jang pơ gang dêh char pơ tho tơ ƀôh, dăr hơ len, vei lăng tơ drong bơ̆ jang tơ̆ dôm anih, dôm tơ ring vă pơm trŏ hăm tơ dỏng hơ găt.

Dơ̆ng: Tơ blơ̆