VOV4.Bahnar - Dêh char Dak lăk hlôi tơchơ̆t jang kiơ̆ ƀet hlŏh 17.000 kơ liêu Covid -19 đơ̆ng năr au, năr 24/4, hrôih hlŏh 3 năr pơtêng hăm tơlĕch hơdrol.

Lơ̆m dêh char Dak Lăk, Dơnŏ anĭh vei lăng jang pơgang hlôi pơtho tơbăt hơdăh ăn rim kơdră chĕp pơgơ̆r, kang ƀô̆, bơngai jang bơ̆ jang ƀet bơ̆ng; tơbăt găh vaccine Covid-19; pơtho tơbăt hơlen hơdrol vă ƀet; pơtho tơbăt ming hơmet hăt hot mư̆h blơ̆ pơgang, sơđơ̆ng ƀet bơ̆ng. Tơdrong jang ƀet vaccine Covid-19 ‘măng mă au, dêh char Dak Lăk đei ƀơk ăn 17.050 kơ liêu vă ƀet ăn 3 khŭl ‘nŏh dôm bơngai bơ̆ jang tơ̆ hnam pơgang, bơngai vang tang găn jĭ păng khŭl ƀô̆ đô̆i kŏng ang. ‘Măng ƀet đơ̆ng năr 24/4 trŭh năr 5/5/2021. Vă ƀet keh đang 95% bơngai ăn ƀet hơdrol đei ƀet bơ̆ng, Dak Lăk iŏk yua hơnĭh ƀet bơ̆ng lơ̆m dêh char păng đei dơ̆ng 2 hơnĭh ƀet bơ̆ng sơđơ̆ng tơ̆ Hnam pơgang tơm Tơring Tây Nguyên păng Hnam pơgang tơm pơlei tơm  Buôn Ma Thuột.

Tơblơ̆ nơ̆r: Amazưt