VOV4.Bahnar – Khei năr tơjê̆ âu đei dôm jĭt rơbâu ‘nu bơngai đơ̆ng dôm dêh char găh pơbăh chôt vih Đăk Lăk. Dôm khul jang Covid lơ̆m pơlei hlôi iŏk ang tơnăp, tơroi tơbăt păng hơlen kon pơlei pơm kiơ̆ tơnăp tơdrong tang găn păng tơjră pơrang jĭ đơ̆ng rim unh hnam. Ƀai chih tơroi găh tơdrong đei ƀôh âu tơ̆ apŭng Cư Kuin.

Pơlei Hluk, xăh Ea Tiêu, apŭng Chư Kuin, dêh char Đăk Lăk ‘nao đei jê̆ ƀar jĭt ‘nu bơngai đơ̆ng dôm dêh char găh pơbăh chôt vih, ataih pơkăp oei tơklăh tơ̆ hnam. Ƀok Y Nguă Buôn Yă, kơdră Khul Covid-19 tơ̆ pơlei Hluk ăn tơbăt: khul ưh adrô̆ chă hơlen bơngai pơkăp oei tơklăh tơ̆ hnam kơdih dăh mă tơ̆ hơdrơ̆n mir, mă hơnơ̆ng tơbăt hăm rim bơngai lơ̆m pơlei nĕ gan vih vơ̆t, akŏm lơ bơngai, pơm kiơ̆ kơjăp pơkăp 5K. Ƀok Y Nguă đei kon drăkăn păng ŏng ‘nao chôt vih đơ̆ng tơring hơbuh pơrang jĭ duh pơm kiơ̆ pơkăp thoi noh: “Kon drăkăn hăm ŏng inh năm jang tơ̆ Bình Dương vih noh đei tơchơ̆t đơ̆ng Anih vei lăng kon pơlei xăh athei pơkăp oei tơklăh tơ̆ hnam 14 năr, noh ưh gơh lĕch tơ̆ ‘nguaih ôh, ưh gơh akŏm pơma dơnuh hăm ‘nhŏng oh kueng ƀôt. Bre klo hơkăn oei hnam adrô̆, oei bre klo hơkăn đĕch. Oei phe, đak, tơmam xa noh kăl athei krao điê̆n thoăi, đang kơ noh inh ‘nhăk ăn, ưh gơh pơma tơjê̆ hăm đe nai”

         Pơlei Hluk đei pơhlom 150 unh hnam kon pơlei mă lei đei truh 5 khul Covid-19 lơ̆m pơlei. Dôm kơtơ̆ng ang găh pơrang jĭ hơnơ̆ng đei akŏm, hăm tơdrong tơroi hơnơ̆ng đơ̆ng dôm khul jang, kon pơlei lơ̆m pơlei băt hơdăh păng pơm kiơ̆ pơkăp 5K tang găn păng tơjră pơrang jĭ. Hơdăh nhen tơdrong groong ƀŭ, kon pơlei pơgơ̆r bot tenh, pơkăp kơsô̆ bơngai. Ƀok Y Sách Bkrông, kơdră pơlei Hluk ăn tơbăt: “Lôch ‘năr âu noh dơning đe ƀŭ bơih. Kon pơlei năm pơjôk đang kơ noh brŏk vih, ưh đei oei đunh. Tơplih hơdăh, tenh mă, ưh đei hiong jên, hiong jơ ‘năr bơih. Kơlih tang găn păng tơjră pơrang jĭ atŭm hăm tơnap tap noh pơm ƀônh đĕch. Dang ei mưh pơdui đunh 3 – 4 năr, roi lơ năr noh huach roi lơ. Mă ƀar noh đe duh băt hơdăh, unh hnam kĕ đei dôm yơ noh bơ̆ dôm ăi đĕch, ‘nhŏng oh gel jat noh mă oei lăi, ưh đei akŏm lơ bơngai bơih”

             Apŭng Cư Kuin jing tơring mă blŭng kơ dêh char Đăk Lăk hơbuh pơrang jĭ Covid-19 lơ̆m dôm pơlei pơla kon kông. Apŭng hlôi đei jơnei lơ̆m tơdrong tơjră pơrang jĭ, hơmet pơ ‘lơ̆ng “tơdrong erih hmă” đơ̆ng jê̆ đĭ khei 8. Vă kon pơlei hơnơ̆ng pơm kiơ̆ kơjăp tơdrong tang găn pơrang jĭ, dôm khul Covid-19 lơ̆m pơlei jing dôm bơngai tơguăt kơtă rim năr chă hơvơn tơroi tơbăt.

 Rim khul thoi noh đei đơ̆ng 4-5 ‘nu jang, đei bơngai kơdrưh lơ̆m pơlei, đảng viên, kang ƀô̆ dôm anih jang tơpôl, jơnŭm pơgơ̆r xăh. Ƀok Y Min Ê Nuôl, Ƀĭ thư anih jang đảng xăh Ea Tiêu, apŭng Cư Kuin tơroi: “Axong ăn rim bơngai pơgơ̆r minh tơring, minh thôn pơlei. Đơ̆ng noh khul jang tơpôl athei tơroi hăm Anih vei lăng kon pơlei xăh, anih jang đảng, khul thôn, pơlei yơ mă ưh đei pơm kiơ̆ tơnăp noh athei tơroi tơtom vă đei trong hơlen hơmet. Khul pơlei pơla noh ‘nhŏng oh ưh kơ mơ̆ng bri găh tô̆ ‘mi, kơmăng kơ ‘năr noh yơ̆ng âu ki khul Covid-19 lơ̆m pơlei jang tôch tơnăp.”  

Ƀok Lê Thái Dũng, Ƀĭ thư Anih jang kơpal apŭng Cư Kuin ăn tơbăt: Lơ̆m 1 giĕng, tơring đei hloh 1.000 ‘nu bơngai chôt vih đơ̆ng dôm dêh char găh pơbăh. Lơ̆m khei năr pơrang jĭ hơbuh hli, kăl tơrĕk tơnăp hloh, apŭng hlôi akŏm truh 547 khul Covid-19 lơ̆m pơlei. Dang ei dôm khul Covid-19 lơ̆m pơlei tŏk bŏk oei jang tơnăp tơdrong hơlen, pơkăp oei tơklăh hăm bơngai chôt vih tơ̆ tơring: “Akŏm đei 547 khul Covid-19 kơ pơlei lơ̆m apŭng vă axong rim khul Covid-19 vei lăng đơ̆ng 20-30 unh hnam noh tơdrong chă hơlen, mă hăt noh bơngai jang đơ̆ng dôm dêh char găh pơbăh, tơ̆ tơring hơbuh pơrang jĭ chôt vih noh athei akŏm khul jang âu, mă kăl lơ̆m rim pơlei pơla. Cư Kuin jô̆ hơlen “tơblăh ayăt hăm du kích”, dang athei axong iơ iĕ, đơ̆ng thôn, pơlei đang kơ noh pơtơm truh tơ̆ xăh, mưh tơnap jat noh pơtơm pơtruh ăn apŭng”

Tơdrong pơjing anih jang tơjră pơrang jĭ kơtă lơ̆m rim pơlei pơla, atŭm hăm dôm trong jang kơtang, hlôi tơgop tơgŭm ăn apŭng Chư Kuin minh khei minh puơ̆t kơ âu ưh đei bơngai ƀơm jĭ Covid-19 tơpoh lơ̆m tơpôl.

Lan chih păng pơre nơ̆r