VOV4.Bahnar - Jơnŭm vei lăng kon pơlei dêh char Dak Lăk ‘nao pơdrơ̆ng kiơ̆ Tơdrong tơchơ̆t hơmet ming, tơmơ̆t dơ̆ng mĭnh ƀar apăng kơ Tơdrong tơchơ̆t 78/2012 găh trong jang tơgŭm djru rôih rong hlông păng pơm dă ƀiơ̆ hrôih pơrăm bơngai, tơmơ̆t dơ̆ng trong tơchơ̆t tơgŭm djru ăn kơ rôih.

Dak Lăk tơplĭh trong tơmang pơ hiơ̆ đơ̆ng yŭn rôih jing tơmang pơ hiơ̆ ‘lơ̆ng hơ iă hăm rôih

Kiơ̆ tơdrong tơchơ̆t ‘nao đei tơplĭh, Dak Lăk gô tơgum djru 500.000 hlak jên ăn tơngla bơngai rong rôih yŏng lơ̆m 1 năr păng 600.000 hlak jên ăn tơngla rong rôih tơno lơ̆m 1 năr, lơ̆m prăt 30 năr rôih tơno rôih yŏng rong tơ giong. Tơdăh rôih yŏng kiĕo, tơngla rôih hơnơ̆ng đei tơgŭm ăn 300.000 hlak jên lơ̆m 1 năr lơ̆m 10 khei blŭng kiĕo, 600.000 hlak jên lơ̆m 1 năr iŏk đơ̆ng khei 11 rôih kiĕo trŭh khei mă 6 lăp đơ̆ng rŏng chông kon. Hăm tơngla vei rôih yŏng, dêh char tơgum ăn 200.000 hlak jên lơ̆m 1 năr prăt lơ̆m 29 khei ... Vă dă ƀiơ̆ đei tơdrong rôih hăm bơngai chă tơblă tơblŭng dĭh băl tơ̆ Dak Lăk, dôm tơring đei rôih bri hlôi đei pơjing rim khŭl vei lăng, mĭnh khul ư̆h kơ hlŏh 10 ‘nu bơngai vă dăr lăng hơlen tơdrong rôih chă yak, pơgơ̆r pŭh hŭt rôih sa ‘long pơtăm kon pơlei.

Tơblơ̆ nơ̆r: Amazưt