VOV4.Bahnar - Tơ̆ hơ năp đei ƀôh krê hơ mơt đơ̆ng jĭ COVID -19 iŏk đơ̆ng ‘năr 15/9 truh dang ei, thị xã Buôn Hồ, dêh char Dak Lak hơ nơ̆ng đei lơ hơ nih bơ ngai jĭ COVID -19 lơ̆m tơ pôl tam mă băt hơ dăh tơ poh đơ̆ng yơ. Kơ sơ̆ ‘năr 17/9, Anih vei lăng găh jang pơ gang dêh char Dak Lak hlôi jang hơ dai hăm Hnam pơ gang thị xã Buôn Hồ tơ lĕch jang iŏk kơ mâu hơ len lăng kiơ̆ trong test hrĕnh păng RT-PCR hăm kon pơ lei tơ̆ 4 phường tŏk bŏk jing tơ ring ƀrê lơ̆m thị xã Buôn Hồ.

Kiơ̆ kơ ‘noh, đơ̆ng năr ‘nâu (18-9) anih jang pơ gang gô pơ gơ̆r hơ len lăng kơ chăng tơ̆ 4 phường lơ̆m thị xã Buôn Hồ ‘noh: Phường An Lạc, An Bình, Thiện An păng Đạt Hiếu. Jơ năr iŏk kơ mâu hơ len lăng gô pơ gơ̆r lơ̆m 7 năr ( đơ̆ng ‘năr 18/9 truh ‘năr 24/9). Tơ chĕng hơ drol đei dang 33.077 ‘nu lơ̆m 8.917 unh hnam đei iŏk kơ mâu hơ len lăng lơ̆m ‘măng âu. Jô̆ truh kơ sơ̆ ‘năr 17/9, thị xã Buôn Hồ đei 180 ‘nu jĭ SARS-CoV-2, 01 ‘nu lôch. Kăl kơ lăng truh, đơ̆ng ‘năr 15/9/2021 truh 5 jơ kơ sơ̆ ‘năr 17/9/2021 thị xã Buôn Hồ đei tơ til 47 ‘nu jĭ COVID-19 hăm lơ bơ ngai jĭ đei ƀơm truh dôm hơ nih răt iŏk tơ mam đơ̆ng choh jang sa, plei ‘long lơ̆m tơ ring.

Thuem: Tơ blơ̆