VOV4.Bahnar - Năr 26/4, dêh char Dak Nông tơlĕch jang ƀet pơgang vaccine Covid-19 mă blŭng ăn ƀok thây pơgang bơ̆ jang tơ̆ hơnĭh tơm tang găn jĭ hơbŭh. Hnam pơgang tơm dêh char Dak Nông păng păng Hnam pơgang tơm kơ pơlei tơm Gia Nghĩa jing ƀar hơnĭh mă blŭng đei rơ̆ih ƀet ăn hơdrol pơgang vaccine Covid-19. 100 ‘nu bơngai đei ƀet bơ̆ng pơgê năr 26/4 ƀlep trong tơlĕch jang đơ̆ng Dơnŏ anĭh tơm vei lăng jang pơgang. Lơ̆m 1 ‘nu bơngai lăp đơ̆ng rŏng ƀet bơ̆ng đei vei lăng hơlen đơ̆ng 30 trŭh 60 pơnĭt jơ vă tang găn hơmơt đei pơgang blơ̆, adoi đei pơtho tơbăt vei lăng kơ dĭh jơhngơ̆m jăn tơ̆ hnam lơ̆m 7 năr. Kiơ̆ đơ̆ng Dơnŏ anĭh vei lăng jang pơgang dêh char Dak Nông, ‘măng ƀet bơ̆ng vaccine mă blŭng pơgơ̆r đơ̆ng nar 26/4 trŭh năr 12/5, tơ̆ 8 hơnĭh bơ̆ jang. Lơ̆m ‘măng blŭng, dêh char Dak Nông đei Dơnŏ anĭh tơm vei lăng jang pơgang ƀơk ăn 9.000 kơ liêu vaccine tang găn Covid-19 đơ̆ng hơnĭh pơm pơgang AstraZeneca. Dak Nông gô ƀet bơ̆ng ăn 2.844 ‘nu bơngai bơ̆ jang tang găn jĭ.

Tơblơ̆ nơ̆r: Amazưt