VOV4.Bahnar - Năr brei (30/7), tơ̆ Hơnĭh ming hơmet bơngai jĭ Covid-19, Dơnŏ anĭh vei lăng jang pơgang dêh char Dak Nông hlôi pơjao hla bơar ăn brŏk đơ̆ng hnam pơgang kơ bơngai jĭ 40924.

Bơngai drŏ nglo jĭ 40924 ‘nŏh V.H.L.E bơ̆ jang vơ̆r gre (rơneh sơnăm 1991, oei tơ̆ thôn Mỹ Long, tơring Mỹ An, apŭng Chợ Mới, dêh char An Giang). Đơ̆ng rŏng khei năr ming hơmet, pơtôch khăm hơlen SARS-CoV-2 kơ bơngai jĭ lơ̆m rim năr 19/7, 26/7 păng 28/7 jei pă đei ƀô̆h sơmach jĭ. Trŭh năr 29/7, bơngai jĭ đei ăn oei hơdrô̆ tôm 15 năr păng pơtôch 2 ‘măng khăm RT-PCR pă đei ƀô̆h sơmach jĭ, pă đei chă jĭ jăn păng hlôi đei tôm rơvơn ăn brŏk. Jô̆ đơ̆ng năr 9/7 trŭh dang ei, Hơnĭh ming hơmet jĭ Covid-19 dêh char Dak Nông hlôi sơng păng tŏk bŏk ming hơmet 30 ‘nu bơngai jĭ. Dang ei jơhngơ̆m jăn kơ dôm bơngai jĭ hlôi vă sơđơ̆ng, lơ bơngai pơtôch khăm hơlen ‘măng mă 1 trŭh ‘măng mă 2 pă đei ƀô̆h sơmach jĭ. Lơ̆m năr, dêh char Dak Nông đei dơ̆ng 4 ‘nu bơngai tơpŏh jĭ Covid-19, atŏk măt bơngai jĭ lơ̆m dêh char truh 59 ‘nu.

Tơblơ̆ nơ̆r: Amazưt