VOV4.Bahnar - Dơnŏ anĭh vei lăng jang pơgang dêh char Dak Nông tơbăt, giĕng au ki, lơ̆m dêh char hlôi tơlĕch jang ƀet vaccine tang găn jĭ Covid-19 ‘măng mă 2 sơnăm 2021 tơ̆ rim hơnĭh ƀet bơ̆ng đei hơmet ăn tơ̆ Hnam pơgang tơm dêh char păng hnam pơgang rim apŭng, pơlei tơm. Bơngai đei ƀet ‘măng mă au ‘nŏh dôm bơngai bơ̆ jang tang găn jĭ Covid-19 ‘nŏh đei khŭl ƀok thây pơgang, ƀô̆ đô̆i, kŏng ang, khŭl jang tơchă bơngai đei oei tơjê̆ hăm bơngai jĭ, bơngai jang tơgŭm, khŭl jang chĭh kơtơ̆ng ang, bơngai jang pơm hla bơar đe mơ̆t lĕch hăm tĕh đak đe, kang ƀô̆ bơ̆ jang ăn mơ̆t lĕch tơ̆ tĕh đak đe păng dăr lăng hơlen jang pơgang apŭng plĕnh tĕh, bơngai jang vơ̆r gre, gre chơ tơmoi tơmang pơ hiơ̆; ƀok thây kô pơtho, bơngai jang tơ̆ hnam trương pơtho pơhrăm vang bơ̆ jang tang găn jĭ. Pơtôch, lơ̆m dêh char hlôi đei 13.452 ‘nu bơngai đei ƀet jrŭm mă 1 vaccine tang găn jĭ Covid-19. Lăp đơ̆ng rŏng ƀet, mĭnh ƀar ‘nu đei pơgang blơ̆ joăt joe nhen chĕp pơgrŭn, jĭ, pơ ‘ngĕh tơ̆ hơnĭh ƀet mă lei ư̆h kơ đei pơm ăn trŭh jĭ ăl ră.

Tơblơ̆ nơ̆r: Amazưt