VOV4.Bahnar - Drơ̆m kơ sơ̆ 9/7, dêh char Dak Nông hlôi đei bơ ngai jĭ SAR-CoV-2 mă blŭng, bơ ngai jĭ ‘noh bơ ngai huơ̆r gre tih hlôi ngôi tơ jê̆ lơ hăm 1,2 ‘nu bơ ngai jang tung tơ mam tơ̆ anih gre dơ̆ng Miền Đông, pơ lei tơm Hồ Chí Minh, kŭm ‘nao đei băt hơ dăh tơ poh jĭ. Bơ ngai drŏ nglo jĭ mă blŭng kơ Dak Nông đei kơ sô̆ BN 26004, rơ neh sơ năm 1995, oei tơ̆ thị trấn Krông K’mar, apŭng Krông Bông, dêh char Dak Lak. Kiơ̆ dăr hơ len pơ rang jĭ dang 15 năr tơ jê̆ âu, bơ ngai jĭ ‘noh jĭ tơ moi hơ nơ̆ng ngôi tơ jê̆ hăm bơ ngai jĭ SAR-CoV-2 jang chă tung tơ mam, pơ jao tơ mam tơ̆ anih gre dơ̆ng Miền Đông, pơ lei tơm Hồ Chí Minh.

Lăp đei kơ tơ̆ng ang, Anih pơ gơ̆r tang găn jĭ Covid-19 dêh char Dak Nông hlôi pơ gơ̆r iŏk pham hơ len lăng. ‘Năr 9/7, hơ len lăng RT-PCR ăn ƀôh jĭ SAR-CoV-2. Dang ei jơ hngơ̆m jăn bơ ngai jĭ hmă. Dêh char Dak Nông hlôi tơ lĕch tơ drong tơ chơ̆t ăn oei hơ drô̆ akŏm hăm dôm bơ ngai đei ngôi tơ jê̆ hăm bơ ngai jĭ tơ̆ anih ăn oei hơ drô̆ akŏm tơ̆ apŭng Đắk R’Lấp.

Thuem: Tơ blơ̆