VOV4.Bahnar -  Kơsơ̆ năr 14/7, dêh char Dak Nông đei dơ̆ng bơngai mă 4 tơpŏh sơmach jĭ SARS-CoV-2. Bơngai jĭ ‘nŏh bơngai drŏ kăn N.T.L, rơnĕh sơnăm 1972, jing bơngai F1 kơ bơngai jĭ 28474,  tŏk bŏk ăn oei hơdrô̆ akŏm tơ̆ Hnam pơgang apŭng Krông Nô đơ̆ng năr 11/7.

Lăp đơ̆ng rŏng băt đei jĭ, Dơnŏ anĭh jang pơgang atŭm hăm khŭl bơ̆ jang hlôi ăn oei hơdrô̆ păng chơ bơngai jĭ hăm gre pơgang đơ̆ng Hơnĭh ăn oei hơdrô̆ kơ Hnam pơgang apŭng Krông Nô năm tơ̆ hơnĭh ăn oei hơdrô̆ ming hơmet jĭ kơ dêh char Dak Nông, adoi iung jang pruih pơgang pơlôch sơmach jĭ đĭ đăng hơnĭh mă bơngai au oei hơdrol kơ ‘nŏh. Rim khŭl bơ̆ jang hlôi dăr lăng, tơchă dôm bơngai đei oei tơjê̆ păng ‘măng mă blŭng đei băt 3 ‘nu bơngai hlôi oei tơ jê̆ pơma dơnŭh hăm bơngai jĭ au ‘nŏh: bơngai klo oei hơdoi lơ̆m hơnĭh ăn oei hơdrô̆, ƀok thây pơgang pơtŏ yŭh kau jăn păng ƀok thây pơgang iŏk pham vă khăm hơlen. Dang ei hơnĭh jang pơgang oei hơnơ̆ng dăr lăng, tơchă dôm bơngai đei ƀơm trŭh lơ̆m jơ ‘năr oei hơdrô̆.

Tơblơ̆ nơ̆r: Amazưt