VOV4.Bahnar - Pơ gê 3/8, dêh char Dak Nông đei dơ̆ng 7 ‘nu bơ ngai tơ pŏh virus SARS-COv-2. Lơ̆m nŏh đei 6 ‘nu kon pơ lei vih đơ̆ng tơ ring đei jĭ găh dôm dêh char Pơ băh, 1 ‘nu F1 kơ hơ druh jĭ H.L.T, rơ nĕh sơ năm 2004, oei tơ̆ apŭng Dak Glong vih đơ̆ng plt Hồ Chí Minh. Đĭ đăng bơ ngai jĭ âu hlôi đei ăn oei hơ drô̆ đơ̆ng rŏng kơ đe sư vih đơ̆ng tơ ring đei jĭ. 

Đĭ đăng bơ ngai jĭ tơ̆ Dak Nông hlôi đei ăn oei hơ drô̆

Đơ̆ng rŏng kơ băt đei bơ ngai tơ pŏh virus SARS-CoV-2, anih jang pơ gang kŭm hăm dôm khul jang kơ pal chơ dôm bơ ngai jĭ năm tơ̆ anih oei hơ drô̆ hơ dai kơ dêh char. Anih jang pơ gang chă đei 25 ‘nu F1 ngôi hơ dai hăm bơ ngai jĭ păng oei hơ len năng trong yak vih vât păng dôm anih mă bơ ngai jĭ truh lơ̆m dang 14 năr adrol ki. Truh dang ei, dêh char Dak Nông đei 96 ‘nu bơ ngai jĭ Covid-19 tơ̆ đĭ đăng apŭng, plt lơ̆m dêh char. Lơ̆m nŏh đei 3 ‘nu bơ ngai jĭ đei hơ met klăih, brŏk đơ̆ng hnam pơ gang bơih.

Dơ̆ng: Tơ blơ̆