VOV4.Bahnar - Kiơ̆ đơ̆ng Dơnŏ anĭh vei lăng jang pơgang dêh char Dak Nông, trŭh dang ei rim tơring hlôi jang keh đang ƀet pơgang vaccine tang găn Covid-19 ‘măng mă 1.

‘Măng mă 1 dêh char hlôi đei Dơnŏ anĭh tơm vei lăng jang pơgang ƀơk ăn hlŏh 9.000 kơ liêu vaccine tang găn Cpovid-19. Vă jang ƀet pơgang vaccine kĕ sĭt, dơnŏ anĭh vei lăng jang pơgang Dak Nông pơgơ̆r ƀet tơ̆ 8 hơnĭh ‘nŏh: Hnam pơgang tơm dêh char păng 7 hnam pơgang apŭng. Dôm bơngai đei ăn ƀet hơdrol ‘măng mă au ‘nŏh kang ƀô̆, ƀok thây pơgang, rim bơngai jang lơ̆m Hơnĭh chĕp pơgơ̆r, khŭl bơ̆ jang pơtho tơbăt tang găn jĭ ... Kiơ̆ Tơdrong tơchơ̆t 21 đơ̆ng Khŭl kơdră tĕh đak. Dơnŏ anĭh vei lăng jang pơgang dêh char Dak Nông tơbăt, lơ̆m dêh char hlôi đei hlŏh 10.200 ‘nu bơngai đei ƀet jrŭm mă 1 vaccine tang găn jĭ Covid-19. Lăp đơ̆ng rŏng ƀet đei hlŏh 1.700 ‘nu bơngai đei ƀô̆h pơgang blơ̆ nhen: chĕp pơgrŭn păh ai, đơ đik, jĭ ƀơ̆t rơka ƀet, hăk păng ư̆h kơ đei ƀô̆h bơngai ayơ jĭ pơgang blơ̆ kơtang ră. Dang ei jơhngơ̆m jăn kơ dôm bơngai đei ƀet sơđơ̆ng grăng akau.

Tơblơ̆ nơ̆r: Amazưt