VOV4.Bahnar - Kiơ̆ đơ̆ng Hơnĭh jang tang găn ji jăn dêh char Dak Nông, akŏp măt bơngai tơpŏh jĭ Covid-19 tơ̆ dêh char au ‘nŏh hlŏh 1.000 ‘nu bơngai.Lơ̆m au hlôi đei 855 ‘nu bơngai đĭ hơmet klăih ăn brŏk tơ̆ hnam, 7 ‘nu bơngai lôch. Măkăl, tơ̆ Pơlei tơm Gia Nghĩa ‘nao ƀô̆h 8 ‘nu bơngai jĭ lơ̆m kon pơlei. Lơ̆m au đei 5 ‘nu bơngai đei ƀơm trŭh bơngai jĭ đei ƀô̆h tơ̆ pơlei tơm Hồ Chí Minh, păng 3 ‘nu bơngai jĭ ‘nŏh bơngai bơ̆ jang lơ̆m hơnĭh hơri karaoke tơpŏh đơ̆ng bơngai jĭ oei tơ̆ dêh char Dak Lăk. Khul bơ̆ jang hlôi iung jang năm tơchă dôm bơngai oei tơ jê̆, hlôi băt hơdăh đei 120 ‘nu F1, lơ̆m au đei 5 ‘nu bơngai mư̆h kham hơlen RT-PCR hlôi ƀô̆h tơpŏh sơmach jĭ SARS-CoV-2.  Hăm 3 ‘nu bơngai jang hơnĭh hơri karaoke đei tơpŏh đơ̆ng dêh char Dak Lăk, dang ei hơnĭh bơ̆ jang dêh char Dak Nông tŏk bŏk tơchă dôm bơngai đei ƀơm trŭh. ‘Măng mă blŭng hlôi băt hơdăh đei mơjĭt hơnĭh tơ̆ Gia Nghiã rim bơngai jĭ au năm trŭh, lơ̆m au đei 1 hơnĭh hơri karaoke, hnam tep pơdơ̆h.

Tơblơ̆ nơ̆r: Amazưt