VOV4.Bahnar - Pơ gê 29/7, AstraZeneca hlôi chơ pơ truh ăn plt Hồ Chí Minh 659.900 kơ liêu vaccine COVID-19 dơ̆ng. ‘Nâu jĭ ‘măng pơ jao vaccine mă 6 lơ̆m hla ar pơ kăp răt iŏk pơ gang đơ̆ng AstraZeneca Việt Nam păng Công ty pơm Vắc xin Việt Nam (VNVC), hăm tơ drong tơ gŭm đơ̆ng Anih tơm vei lăng jang pơ gang.

Dang ei, drơ̆ng nơ̆r âu hlôi hơ nhăk ăn Việt Nam vă jê̆ 3,8 triu liêu, hơ tŏ hăm dang 41% akŏm đĭ đăng kơ sô̆ vaccine COVID-19 đơ̆ng AstraZeneca lơ̆m tĕh đak. Akŏm đĭ đăng đei vă jê̆ 9,3 triu kơ liêu vaccine COVID-19 đơ̆ng AstraZeneca đei chơ pơ truh ăn Việt Nam.

Ƀok Nitin Kapoor, Kơ dră chĕp kơ̆l AstraZeneca Việt Nam păng dôm tĕh đak Châu Á ‘nao tŏk ăn tơ băt: vă hơ nơ̆ng jang hơ doi hăm Anih tơm vei lăng jang pơ gang, WHO, UNICEF păng VNVC hơ nhăk vaccine vĭh tơ̆ Việt Nam hrĕnh hlŏh păng sơ đơ̆ng hlŏh, vă kon pơ lei jăh vih dơ̆ng hăm tơ drong arih xa hmă păng oei xa hơ dai hăm hnam tơ nŏ.

Dơ̆ng: Tơ blơ̆