VOV4.Bahnar - {et bơ\ng ăn hơ io\h tơ drong jang kăl hlo\h mă rim me\ [a\ hơ yơ ku\m kăl athei băt păng pơm kiơ\ ăn kơ kon. Tơ drong [et bơ\ng ư\h khan lăp tơ gu\m hơ to\k jơ hngơ\m pran ăn hơ io\h mă oei tơ gop g^t kăl tang găn hơ mơt đei j^ 1 trong jơ nei. Dôm tơ drong tơ roi tơ\ hơ la âu gô tơ gu\m m^h ma duch nă păng bôl buăl hlo#h hơ dăh hlo\h găh tơ drong [et bơ\ng sơ đơ\ng.

Dôm sơ năm tơ je# âu, tơ drong [et bơ\ng ăn hơ io\h đei rim đe me\ [a\ tôch kơ lăng kăl. {o#h hơ dăh ‘no\h j^ ‘ngoăih tơ drong [et bơ\ng tôm rim jru\m [et đe\ch kiơ\ tơ drong jang [et bơ\ng pơ\ih să, lơ đe me\ [a\ ăn kon hơ ‘lơ\p kơ d^h [et thim 1,2 kơ loăi pơ gang vaccine tang găn j^ nai. ‘Nâu j^ đei [o#h chhôk hơ iă lơ\m tơ drong hơ to\k ‘lơ\ng hlo#h vao găh vei lăng jơ hngơ\m jăn lơ\m tơ pôl. Mă lei, lơ\m kơ plăh ba hơ io\h năm [et bơ\ng hlôi đei lơ đe me\ [a\ bơ ngơ\t lơ\m tơ drong vei sơ đơ\ng jơ hngơ\m pran ăn kơ kon.  

Tơ\ hơ la âu ‘no\h j^ nơ\r pơ tho akhan đơ\ng rim bơ ngai joăt jang pơ gang:

Hơ drol kơ năm [et bơ\ng, ư\h kơ gơ\h ăn hơ io\h sa dăh mă mo\m ph^ de#h hnang mă lei ku\m ư\h kơ le# hơ io\h pơ ngot vă ve\h ver tơ drong tơ jur trong pham đơ\ng ro\ng kơ [et. Pơm rơ go\h hơ kâu jăn vă tang găn đei pơ chu\ng. Mư\h [et bơ\ng, kăl kơ ăn hơ io\h hru\k hơ băn ao rơ hơi, rơ ngơp vă tơ gu\m đe [ak si pơm [ônh lơ\m tơ drong khăm. Vă tơ jur [iơ\ dôm tơ drong krê hơ mơt tơ jră đơ\ng ro\ng [et, mư\h ba hơ io\h năm [et bơ\ng, me\ [a\ kăl kơ che\p ba hla ar [et bơ\ng ăn hơ io\h păng tơ roi tơ băt ăn kang [o# jang pơ gang găh tơ drong jơ hngơ\m jăn kon hơ ‘lơ\p kơ d^h, nhen: rơ ne\h thoi yơ, j^ jăn, tơ jră pơ gang kiơ păng sa tơ mam sa ư\h kơ lăp. Mă loi ‘no\h kăl kơ lăng tru\h dôm tơ drong tơ jră pran hăm ‘măng [et hơ drol, nhen: yu\h de#h, nhơ\m pơ dui đunh, le\k hăk, le\ch [re [rônh... vă kơ kang [o# jang pơ gang gơ\h tơ tă hơ drol kơ [et păng pơ dơ\h ‘mơ\i năr [et mư\h kăl. {ak si Phạm Văn Lào- Kơ dră vei lăng an^h jang pơ gang tang găn j^ jăn Dak Lak pơ tho tơ [o#h:

Tơ dăh hơ io\h đei tơ jră ăl tơ\ ‘măng [et bơ\ng hơ drol ‘no\h tơ\ ‘măng [et đơ\ng ro\ng, u\nh hnam kăl kơ ba hơ io\h năm khăm, hơ len lăng mă hơ len hơ drol kơ vă ăn [et dơ\ng dăh ư\h. Mư\h hơ io\h yu\h de#h hlo\h 38,5 độ C ’no\h athei pơ dơ\h ‘mơ\i ‘măng [et ‘no\h. Mă 2 dơ\ng ‘no\h j^ tơ dăh hơ io\h đei j^ 1,2 tơ drong j^ tơ po\h ‘no\h me\ [a\ athei ba hơ io\h năm tơ\ rim hnam pơ gang va\ hơ met, tơ\ no\h đe [ak si gô pơ tho tơ [o#h, ăn tơ drong [et bơ\ng dăh ư\h.

Găh trong [et bơ\ng tơ\ hnam pơ gang xăh, [ak si Lê Thị Xuân Hạnh, kơ dră vei lăng hnam pơ gang phường Tân An, pơ lei tơm Buôn Ma Thuột, de#h char Dak Lak tơ băt:

Hơ drol kơ pơ gơ\r [et bơ\ng, nhôn đei hơ met ăn kơ [ang pơ tho tơ băt khăm hơ len. Tơ\ âu nhôn pơ tho ăn bơ ngai me\ dôm tơ drong gơ\h [et păng ư\h kơ gơ\h [et. Tơ tă ăn bơ ngai me\ oei ‘mơ\i hơ len lăng đơ\ng ro\ng [et 30 pơ n^t. Tơ tă ăn bơ ngai me\ đơ\ng ro\ng bro\k tơ\ hnam mư\h kon yu\h, đei [o#h ư\h pha ‘no\h ba năm tơ\ hnam pơ gang xăh hloi.   

Đơ\ng ro\ng kơ [et, hơ io\h kăl oei dơ\ng tơ\ an^h [et bơ\ng dang 30 pơ n^t vă hơ len lăng jơ hngơ\m jăn. Mư\h bro\k tơ\ hnam, kăl hơ nơ\ng hơ len lăng hơ io\h to\ se\t hlo\h tru\h 24jơ đơ\ng ro\ng [et vă lăng [o#h păng hơ met tơ tom dôm tơ drong tơ jră. Kơ plăh âu me\ [a\ oei ăn hơ io\h so\ng sa, hum hơ rao hmă.

{ơ\t an^h [et hơ io\h đei pơ ‘nge\h [rê mă lei ‘nâu ư\h kơ đei [o#h krê kiơ păng gô klăih kơ d^h, hoei kơ bơ ngơ\t kiơ. Athei dan che rơ ngơp [ơ\t an^h [et ăn hơ io\h, tơ gu\m tơ jur j^, ư\h kơ gơ\h u\h to\. Kăl kơ lăng tru\h ăn hơ io\h nhă lơ đak dăh mă mo\m me\ lơ hlo\h dăh mă hru\k hơ băn ao rơ hơi, rơ ngơp. Mư\h hơ io\h yu\h de#h, me\ [a\ gơ\h ăn hơ io\h yua pơ gang tơ jur yu\h mă lei athei kiơ\ nơ\r pơ tho đơ\ng kang [o# jang pơ gang. Ư|h kơ gơ\h ăn hơ io\h huch pơ gang tơ jur yu\h mư\h hơ io\h ‘nao đei [et bơ\ng yua kơ pơm thoi no\h ‘no\h j^ ư\h kơ đei yua păng [ơ\t lăp gô pơm krê hơ mơt ăn hơ io\h. Ư|h kơ gơ\h ming dôm tơ mam yơ hơ, nhen, kok kơ tăp ie\r, [um tây pơ klep tơ jur yu\h tơ\ an^h [et yua kơ thoi no\h gô pơm tơ jur đei yua đơ\ng pơ gang vaccine. tơ drong g^t kăl hlo\h ‘no\h j^ me\ [a\ kăl ăn hơ io\h năm [et bơ\ng [lep năr păng [et ming dơ\ng mă tôm.  

Thuem tơ blơ\