VOV4.Bahnar - Jei tơ̆ hop akŏm Khŭl kơdră chĕp pơgơ̆r tĕh đak găh tang găn jĭ Covid-19, Kơdră chĕp pơgơ̆r Dơnŏ anĭh tơm vei lăng jang pơgang Nguyễn Thanh Long tơbăt, lơ̆m tĕh đak hlôi ƀet pơgang vaccine ăn 20.695 ‘nu bơngai, lơ̆m au lăp tŏ sĕt bơngai đei pơgang blơ̆ păng dang ei jơhngơ̆m jăn đe sư hlôi sơđơ̆ng. Mă kăl tim mă ƀô̆h đei bơngai ayơ đei ƀơm trŭh pham krăr nhen hlôi tơtăm hơdrol. Mă lei, vă đei sơđơ̆ng ‘lơ̆ng hơ iă, Dơnŏ anĭh tơm jang pơgang pơrô̆ athei rim hnam pơgang hơnơ̆ng atŏk kơtang pơtho pơhrăm ming ă kang ƀô̆ ƀok thây pơgang păng jang kiơ̆ rim hơnih ƀet ƀlep ‘lơ̆ng. ‘Ngoăih pơgang vaccine răt iŏk đơ̆ng tĕh đak đe, Dơnŏ anih tơm vei lăng jang pơgang atŏk kơtang bơ̆ jang chă tơchĕng, pơm tơlĕch pơgang vaccine lơ̆m tĕh đak. Vaccine Nanocovax kơ yuơ Kŏng ty NANOGEN pơm tơlĕch hlôi đei ƀet pơlong năng ‘măng mă 2 tơ̆ bơngai đơ̆ng năr 26/02/2021. Vaccine Covivac kơ IVAC pơm tơlĕch đei ƀet pơlong blŭng a đơ̆ng năr 15/3/2021. Pơgang vaccine kơ yuơ Việt Nam pơm tơlĕch gô đei iŏk yua lơ̆m sơnăm 2022 vă măh mai đei pơgang vaccine, sơđơ̆ng ‘lơ̆ng hơ iă, kĕ tang găn rim pơgang jĭ lơ̆m đunh đai tai sơnăm.

Tơblơ̆ nơ̆r: Amazưt