VOV4.Bahnar - Kiơ̆ đơ̆ng Dơnŏ anĭh tơm vei lăng jang pơgang tơbăt, hrei au hơ iŏh tim mă trŭh 18 sơnăm tim mă ăn ƀet vaccine bơ̆ng jĭ Covid-19, kơ yuơ lơ lŏh, tơdăh ư̆h kơ đei tơdrong kăl, mĕ ƀă, bơngai ‘lŏ kră dăh pơtho khan ăn hơ iŏh ‘nĕ lĕch tơ̆ trong. Đei ƀơm trŭh tơdrong chă yak au to kơ đe hơ iŏh mư̆h mĭnh ƀar pơlei tơm đei ăn asong chă yak hiôk hian dơ̆ng, tơdăh kăl vă lĕch tơ̆ trong lei, hơ iŏh tim mă trŭh 18 sơnăm kăl pơm kiơ̆ kơ jăp 5K. Găh trong jang ƀet vaccine tang găn jĭ Covid-19 ăn hơ iŏh, Dơnŏ anĭh tơm vei lăng jang pơgang hlôi tơlĕch jang pơjing nơ̆r pơtho tơbăt đei ƀơm trŭh tơdrong ƀet bơ̆ng ăn hơ iŏh đơ̆ng 5 trŭh 17 sơnăm. Hơdrol kơ ‘nŏh, tơ̆ hop akŏm joăt joe Khŭl kơdră Tĕh đak, Kơ iĕng kơdră Dơnŏ anĭh vei lăng jang pơgang Đỗ Xuân Tuyên tơbăt, hlôi pơrô̆ athei Hơnĭh tơm Jang pơgang tang găn jĭ păng Jơnŭm vaccine tĕh đak chă tơchĕng, ‘măng blŭng hlôi drơ̆ng mĭnh nơ̆r hơlen kiơ̆ kơ loăi vaccine vă ƀet bơ̆ng ăn hơ ioh tim mă trŭh 18 sơnăm. Tơdrong mă au tŏk bŏk apinh nơ̆r tơgop đơ̆ng rim bơngai khoa hŏk păng hơnĭh bơ̆ jang găh au vă tơlĕch jang kiơ̆ lơ̆m khei năr kơnh.

Tơblơ̆ nơ̆r: Amazưt