VOV4.Bahnar - Pơgê năr 9/7, dêh char Lâm Đồng đei ƀô̆h dơ̆ng 1 ‘nu bơngai tơpŏh jĭ Covid-19. ‘Nau bơngai F1 kơ hơnĭh jĭ đei 3 ‘nu bơngai jĭ đơ̆ng pơlei tơm Hồ Chí Minh. Bơngai tơpŏh jĭ Covid-19 ‘nao ƀô̆h tơ̆ Lâm Đồng ‘nŏh ƀok N.H.D.K, oei tơ̆ thôn Phú Thạnh, tơring Hiệp Thạnh, apŭng Đức Trọng (bơ̆ jang tơ̆ Hơnĭh mong jên Agribank Lâm Đồng). Lơ̆m dôm năr au ki, ƀok K đei tơ ƀơ̆p pơma dơnŭh hăm 3 ‘nu bơngai jĭ đei ƀô̆h tơpŏh jĭ Covid-19 lơ̆m năr 7/7.

Lâm Đồng khăm hơlen rim bơngai tơ ƀơ̆p pêng ‘nu bơngai jĭ

Vă sơđơ̆ng ăn bơ̆ jang tang găn jĭ, pơgê năr 9/7, Dơnŏ anĭh vei lăng jang pơgang Lâm Đồng hlôi tơlĕch nơ̆r tơbăt gĭt kăl tơchă dôm bơngai đei ƀơm trŭh tơ̆ 8 tơring lơ̆m pơlei tơm Đà Lạt păng 2 apŭng Đơn Dương, Đức Trọng. Adoi tơlĕch jang kơtang năm tơchă dôm bơngai oei tơ jê̆ vă ăn oei hơdrô̆, khăm hơlen pham păng hơlen pơrang jĭ. Trŭh dang ei, khŭl bơ̆ jang dêh char Lâm Đồng hlôi ƀô̆h đei 83 ‘nu bơngai F1 păng 571 ‘nu bơngai F2 đei ƀơm trŭh 3 ‘nu bơngai jĭ đơ̆ng pơlei tơm Hồ Chí Minh.

Tơblơ̆ nơ̆r: Amazưt