VOV4.Bahnar - Pơgê năr 19/11, kơtơ̆ng ang đơ̆ng Dơnŏ anĭh chĕp pơgơ̆r tang găn jĭ apŭng Đak Đoa, dêh char Gia Lai, hlŏh đơ̆ng khăm test rĕnh, tơring au đei 125 ‘nu bơngai tơpŏh sơmach jĭ Sars-Cov-2. Lơ̆m au, 58 ‘nu bơngai hlôi đei khăm hơlen hăm Real time PCR đei ƀô̆h tơpŏh jĭ.

Dang ei đei 5 lơ̆m 8 pơlei tơ̆ tơring Hà Bầu đei bơngai tơpŏh jĭ Covid-19. Tơ̆ au, lơ tơring đei jĭ hơbŭh pơrăm kơtang tŏk bŏk pơlăp pơvang tang găn vă tơchă dôm bơngai oei tơ jê̆ ‘moi kiơ̆ khăm hơlen nhen Hnam trương jăl kơ đĕh Hà Bầu; Hnam jŏh ayŏ tơring Hà Bầu; mĭnh ƀar hơnĭh tĕch huch đak chehphe; hơnĭh kăt sŏk tơ̆ trong sơlăh ƀar păh tơring Hà Bầu păng tơring Nam Yang (apŭng Đak Đoa). Dơnŏ anĭh chĕp pơgơ̆r tang găn jĭ hơvŭh Covid-19 dêh char Gia Lai hlôi ăn khŭl bơ̆ jang năm tơ̆ apŭng Đak Đoa vă vang iung jang tang găn jĭ. Apŭng Đak Đoa athei kon pơlei pơm kiơ̆ kơ jăp tơdrong tơchơ̆t 5K; ư̆h kơ kŏm lơ bơngai; tơtom tơroi tơbăt ăn kơdră tơring tơdăh đei tơ ƀơ̆p hăm dôm bơngai jĭ, rim hơnĭh đei bơngai tơpŏh jĭ dăh mă tơdăh đei ƀô̆h chă chĕp pơgrŭn, hiĕn, dui jơhngơ̆m ư̆h kơ hiôk.

Tơblơ̆ nơ̆r: Amazưt