VOV4.Bahnar – Kơsơ̆ măng năr 28/5, kiơ̆ đơ̆ng hơlen pham, Anih jang Hơlen pơrang jĭ (CDC) Gia Lai ƀôh đei 1 ‘nu ƀơm jĭ SARS-CoV-2 tơpoh đơ̆ng Hà Nội. Hơdăh, bơngai âu hơnăn L.H.L (rơneh xơnăm 1977, oei tơ̆ thĭ trâ̆n Kông Chro, apŭng Kông Chro, Gia Lai). Bơngai âu xơ̆ noh F1 kơ bơngai ƀơm jĭ Covid-19 kơsô̆ 5410. KIơ̆ chă hơlen, CDC Gia Lai xơkơ̆t 18 ‘nu F1 păng 95 ‘nu F2 tơjê̆ hăm bơngai jĭ âu.

Dang ei, dôm bơngai âu đei pơkăp oei pha trŏ kiơ̆ tơchơ̆t; atŭm hăm noh dôm tơring ƀônh tơpoh đei tơrĕk truh bơngai jĭ âu hlôi athei tang ‘măng, pơtĕm tơbang păng đei pruih pơgang pơlôch xơmach kiơ̆ pơkăp. Jơnŭm tang găn păng tơjră Covid-19 Gia Lai pơkăl rim anih jang, rim tơring athei kơchăng hăm tơdrong tang găn păng tơjră pơrang jĭ; pơtoi pơm kiơ̆ tơnăp tơdrong hơlen chơ chă dôm bơngai chôt vih đơ̆ng tơring hơbuh pơrang, rim bơngai juăt jang, bơngai teh đak đe tŏk bŏk oei pơm jang lơ̆m tơring, athei iŏk hơlen pham vă tang găn păng tơjră jĭ tơtom hloh.

Lan chih păng pơre nơ̆r