VOV4.Bahnar - Drơ̆m kơ sơ̆ brei 16/7, Gia Lai đei dơ̆ng 1 ‘nu jĭ SARS-COV-2. Iŏk đei kơ tơ̆ng ang đei bơ ngai test hrĕnh đei ƀôh jĭ tơ̆ Hnam pơ gang Đại học Y dược Hoàng Anh Gia Lai ‘noh N.T.T.N, rơ neh sơ năm 1978, oei tơ̆ kueng kơ phô̆ 8, thị trấn Phú Túc, apŭng Krông Pa, dêh char Gia Lai. Anih vei lăng tơ drong jĭ jăn dêh char Gia Lai hlôi ăn kang ƀô̆ dăr hơ len băt hơ dăh pơ rang jĭ păng pơ gơ̆r iŏk pham hơ len lăng. Truh 4 jơ kơ sơ̆ năr âu mơ̆n, pơ tôch hơ len lăng đei jĭ SAR-COV-2. Bơ ngai jĭ âu hlôi đei chơ ba ăn oei hơ drô̆, hơ met tơ̆ Hơ nih hơ met bơ ngai jĭ Covid-19, Hnam pơ gang Đa khoa dêh char Gia Lai. Lăp đơ̆ng rŏng kơ iŏk đei kơ tơ̆ng ang găh bơ ngai tơ poh jĭ N.T.T.N, Anih pơ gơ̆r jang tang găn jĭ Covid-19 dêh char Gia Lai hlôi pơ gơ̆r tơ chă dôm bơ ngai ngôi tơ jê̆ hăm bơ ngai jĭ; jang kiơ̆ dôm trong jang tang găn jĭ covid-19 kiơ̆ tơ drong hơ găt.

Thuem: Tơ blơ̆