VOV4.Bahnar - Anih pơ gơ̆r tang găn jĭ Covid-19 Gia Lai tơ roi tơ băt, lơ̆m gơ măng ‘năr 4/8, đei dơ̆ng 25 ‘nu bơ ngai jĭ Covid-19. Akŏm đĭ đăng bơ ngai jĭ lơ̆m năr ‘noh 38 ‘nu. ‘Nâu kŭm jing kơ sô̆ bơ ngai jĭ lơ̆m năr lơ hloh đơ̆ng hơ drol truh dang ei. Mă hơ dăh ‘noh, lơ̆m 38 ‘nu jĭ Covid-19, găh lơ ‘noh bơ ngai brŏk đơ̆ng tơ ring jĭ, adoi đei ăn oei hơ drô̆ păng hơ len lăng hlôi ƀơ̆t mơ̆t lơ̆m dêh char. 3 ‘nu ‘noh F1 kơ bơ ngai jĭ kơ sô̆ BN 36712; 1 ‘nu ‘noh bơ ngai tơ gŭm bơ ngai huơ̆r gre, chơ tơ mam đơ̆ng pơ lei tơm Hồ Chí Minh- Đồng Nai năm tơ̆ dêh char Kon Tum, hlôi drong păng oei kơ tă tơ̆ pơ lei tơm Pleiku đơ̆ng ‘năr 30/7 truh dang ei. Bơ ngai âu đei chă ƀôh jĭ Covid-19 ƀơ̆t kơ dih năm hơ len lăng hrĕnh. Dêh char hlôi tơ chă păng hơ len lăng hloi 10 ‘nu ‘noh F1. Hơ len lăng blŭng ư̆h kơ đei ƀôh jĭ SARS-CoV-2. Thoi noh, đơ̆ng ‘năr 26/4 truh pơ gê ‘năr 5/8/ 2021, dêh char Gia Lai đei 159 ‘nu jĭ SARS-CoV-2, lơ̆m noh 7 ‘nu hlôi brŏk đơ̆ng hnam pơ gang.

Thuem: Tơ blơ̆