VOV4.Bahnar - Pơ gê 22/7, Anih vei lăng tơ drong jĭ jăn dêh char (CDC) Gia Lai roi tơ băt, tơ̆ âu đei dơ̆ng 4 ‘nu bơ ngai ‘nao jĭ Covid-19, hơ tŏk đĭ đăng kơ sô̆ bơ ngai jĭ lơ̆m ‘măng jĭ tơ pŏh âu truh 21 ‘nu. Lơ̆m nŏh, đei 3 ‘nu F1 kơ dôm bơ ngai jĭ tơ̆ Kon Tum păng apŭng Krông Pa, 1 ‘nu công nhân đơ̆ng Bình Dương vih tơ̆ Gia Lai, oei ăn oei hơ drô̆ tơ̆ apŭng Phú Thiện.

Gia Lai vei kơ jăp gre kơ dâu, ăn bơ ngai oei hơ drô̆ tơ̆ dôm anih gak hơ len jĭ

Dôm anih đei ƀơm truh dôm bơ ngai jĭ ‘nao âu akŏm tơ̆ thĭ trơ̆n Kbang, păng plt Pleiku. Dang ei, Dơ nŏ anih vei lăng kon pơ lei apŭng Kbang, Dơ nŏ anih vei lăng kon pơ lei plt Pleiku đei hla ar chih athei pơ dơ̆h ‘mơ̆i dôm tơ drong tĕch mơ dro, jang xa ưh kơ kăl nhen anih hơ ri karaoke, massage, tơ plŏng kơ dâu, pơm ngôi điên tư, pơ gơ̆r thi pơ long. Dôm anih et xa, huch chĕh phe athei pơm kiơ̆ mă ‘lơ̆ng dôm tơ drong hơ găt tang găn jĭ; sek tơ lang tơ păt dôm bơ ngai ưh đei gom muh măt mưh lĕch lơ̆m tơ pôl.

Dơ̆ng: Tơ blơ̆