VOV4.Bahnar - ‘Năr dơ̆ng 5/8, 1 ‘nu drŏ kăn jĭ Covid-19 tơ̆ dêh char Gia Lai đei đe y ƀak si tơ gŭm răih iŏk kon nge sơ đơ̆ng ‘lơ̆ng. Ƀak si Nguyễn Tấn Phúc- Kơ dră chĕp kơ̆l Hnam pơ gang hơ met jĭ Covid-19 dêh char Gia Lai ăn tơ băt, bơ ngai jĭ đei kơ sô̆ BN109113 đơ̆ng tơ ring đei jĭ vih, đei jĭ Covid-19 păng mât tơ̆ hnam pơ gang đơ̆ng ‘năr 31/7.

Drŏ kăn jĭ covid-19 rơ nĕh kon sơ đơ̆ng ‘lơ̆ng

Lơ̆m hlŏh 1 giĕng âu ki, bơ ngai jĭ hơ nơ̆ng đei khăm hơ len jơ hngâm pran yoa sư mât lơ̆m khei hơ năp mă hơ tuch. Pơ gê 5/8, bơ ngai jĭ vă rơ nĕh, hnam pơ gang krao e kip răih đơ̆ng Hnam pơ gang Đa khoa Gia Lai truh tơ gŭm. Đe y ƀak si hlôi răih iŏk kon nge sơ đơ̆ng ‘lơ̆ng, nge trăp 3,8 kĭ. Dang ei, hnam pơ gang ăn nữ hộ sinh vei lăng hơ drô̆ ăn bơ ngai mĕ păng nge ‘nao rơ nĕh, jang ‘lơ̆ng dôm tơ drong tang găn jĭ tơ pŏh hơ drom băl.

Dơ̆ng: Tơ blơ̆