VOV4.Bahnar - Pơ gê brei, 9/3, dê̆h char Gia Lai pơ gơ̆r ƀet 61 kơ liêu vaccine blŭng a lơ̆m 1900 kơ liêu vaccine Covid-19 đei Anĭh tơm vei lăng găh tơ drong jang pơ gang klăih song ăn. Kiơ̆ kơ ‘nŏh, khŭl jang kang ƀô̆ jang pơ gang tơ̆ Hnam pơ gang pơm tơ̆ ‘ngoăih hơ met jĭ Covid-19 dê̆h char ‘nŏh jĭ dôm bơ ngai blŭng a đei ƀet bơ̆ng. Kiơ̆ đei ƀô̆h yan âu, hlôi đei 12 ‘nu kang ƀô̆ jang  pơ gang tơ̆ hnam pơ gang pơm tơ̆ ‘ngoăih hơ met jĭ Covid-19 Gia Lai đei ƀet vaccine Covid-19 tă kơ hiôk găh jơ hngơ̆m đon, ư̆h kơ đei tơ ƀơ̆p kiơ đơ̆ng rŏng kơ ƀet.

Lơ̆m 2 năr ‘năr 9 păng 10/3, kŭm hăm 61 ‘nu kang ƀô̆ jang pơ gang tơ̆ Hnam pơ gang pơm tơ̆ ‘ngoăih hơ met jĭ Covid-19, ‘nŏh 39 ‘nu kang ƀô̆ jang pơ gang tơ̆ 1,2 khoa kơ Hnam pơ gang Đa khoa Gia Lai kŭm gô đei ƀet vaccine. 1800 kơ liêu vaccine Covid-19 uơ oei dơ̆ng gô đei klăih song ăn tơ̆ dôm tơ ring đei jĭ ƀet bơ̆ng ăn kơ dôm bơ ngai tŏk bŏk bơ̆ jang tơ drong jang tang găn jĭ.

Thuem: Tơ blơ̆