VOV4.Bahnar - Dơnŏ anĭh tơm chă tơchĕng hơlen pơrang jĭ Trung ương ‘nao đei tơchơ̆t klăh asong 100.000 kơliêu vaccine AstraZeneca ăn rim hơnĭh lơ̆mtơring Hà Nội. Pơgang vaccine au kơ yuơ Khŭl kơdră tĕh đak Hungary tơgŭm ăn, đei pơm tơlĕch tơ̆ tĕh đak Ý. Dơnŏ anĭh tơm chă tơchĕng hơlen pơrang jĭ Trung ương tơbăt, lơ̆m 100.000 kơliêu au, đei klăh asong ăn Hnam pơgang hơmet jĭ Tơsŏh Trung ương 10.000 kơliêu, Hnam pơgang Bạch Mai 8.000 kơ liêu, Hnam Pơgang Nhi Trung ương, Hnam pơgang E, Hnam pơgang Hữu nghị mĭnh hơnĭh sơng iŏk đei 6.000 kơliêu, Hnam trương Đăi hŏk Y hà Nội sơng iŏk 5.000 kơliêu. Dơnŏ anĭh chă tơchĕng hơlen pơrang jĭ Trung ương sơng iŏk đei 51.000 kơliêu vă klăh asong ăn rim tơring. Kiơ̆ tơdrong tơchơ̆t klăh asong au, Dơnŏ anĭh tơm chă tơchĕng hơlen pơrang jĭ Trung ương athei rim hơnĭh pơgơ̆r ƀet bơ̆ng vaccine au ăn kon pơlei lơ̆m pơlei tơm Hà Nội, sơđơ̆ng iŏk yua vaccine kĕ sĭt, ƀlep tơdrong, ƀlep bơngai.

Tơblơ̆ nơ̆r: Amazưt