VOV4.Bahnar - Đơ̆ng rŏng 9 năr hơ tŏk jang, Hà Nội hlôi jang đang tơ drong ƀet vaccine bơ̆ng jĭ covid-19 ăn kon pơ lei đơ̆ng 18 sơ năm tơ̆ kơ pal. Tơ dăh nhen hơ drol, Hà Nội athei hiong lơ khei vă iŏk đei kơ sô̆ 2,2 triệu ‘nu kon pơ lei đei ƀet vaccine bơ̆ng jĭ covid-19, ‘noh lơ̆m ‘măng âu, Hà Nội hlôi ƀet đei vă jê̆ 3 triệu jrŭm. Hăm kơ sô̆ kon pơ lei 5,75 triệu ‘nu đơ̆ng 18 sơ năm tơ̆ kơ pal, Hà Nội hlôi iŏk đei hloh 96% kơ sô̆ kon pơ lei ƀet tŏ sĕt hloh 1 jrŭm vắc xin tang găn jĭ covid-19. Tơ̆ đĭ đăng dôm hơ nih ƀet tă kơ đei hơ met hiôk ăn kon pơ lei năm ƀet, vei sơ đơ̆ng dôm tơ drong hơ găt tang găn jĭ nhen: ôp ti, hơ len lăng hơ kâu yuh. Vă vei sơ đơ̆ng hrĕnh, tơ drong hơ găt tơ lĕch ăn lơ̆m tơ drong jang ƀet bơ̆ng, pơ lei tơm Hà Nội athei rim tơ ring, hơ nih ƀet pơ gơ̆r ƀet 3 ‘măng 1 năr.

Thuem: Tơ blơ̆