VOV4.Bahnar - Đơ̆ng năr 27/6 trŭh dang ei, tơ̆ Hnam pơgang pơm Pơgia kơsô̆ 1 pơlei tơm Hồ Chí Minh hlôi đei hlŏh 1.700 ‘nu bơngai jĭ Covid-19 đei ăn brŏk đơ̆ng hnam pơgang. ‘Nau jing dôm bơngai jĭ mư̆h khăm hơlen pă đei ƀô̆h sơmach jĭ dăh mă sơmach jĭ pă gan kơtang, pă kĕ vă tơpŏh tơ̆ bơngai anai.

Pơm hla bơar ăn bơngai jĭ brŏk

Hnam pơgang pơm pơgia kơsô̆ 1 đei 4.500 tŏ giơng tep pơjing tơ̆ hnam oei kơ Hơnĭh tơm Pơtho pơhrăm vei lăng tĕh đak păng Sơđơ̆ng găh Hnam trương Đăi hŏk tĕh đak pơlei tơm Hồ Chí Minh, đei iung jang đơ̆ng năr 26/6. Tơ̆ au tŏk bŏk ming hơmet ăn 4.423 ‘nu F0. Hnam pơgang au ming hơmet đĭ đăng bơngai ‘nao tơpŏh jĭ păng dôm bơngai tŏk bŏk ăn oei hơdrô̆ akŏm (F1 đei jing F0). Đơ̆ng năr 13/7, Dơnŏ anĭh vei lăng jang pơgang pơlei tơm Hồ Chí Minh tơlĕch jang pơlong năng kơđĕh năr ming hơmet F0 ư̆h kơ ƀô̆h chă jĭ tơ̆ hnam pơgang.Kiơ̆ kơ ‘nŏh, F0 kham hơlen RT-PCR năr mă 10 pă đei ƀô̆h sơmach jĭ dăh mă oei đei ƀô̆h sơmach jĭ mă lei pă gan kơtang ‘nŏh chơ ba ăn oei hơdrô̆ tơ̆ hnam tơdăh đei rơvơn sơđơ̆ng ‘lơ̆ng hơ iă, tang găn tơpŏh.

Tơblơ̆ nơ̆r: Amazưt