VOV4.Bahnar – Hop akŏm Hơƀăp Joh ayŏ jâ̆p teh đak iŏk jang kiơ̆ Tơchơ̆t Hop akŏm Đảng jâ̆p teh đak 'măng mă 13 kơyưo Anih tơm Chĭnh trĭ, Anih jang Ƀĭ thư pơgơ̆r đei lăng nhen minh “Hop akŏm Diên Hồng găh Joh ayŏ Hơƀăp kơ Đảng” 'nao đei pơgơ̆r tơ̆ Hà Nội. Tơ̆ hop akŏm, rim bơngai tang măt akŏm pơma đam găh tơdrong pơgơ̆r jang kiơ̆ Pơkăp joh ayŏ oei xa hơƀăp truh xơnăm 2030, atŭm hăm noh pơm hơdăh dôm tơdrong pơkăp găh pơma xa păng tơdrong đei ƀôh lơ̆m joh ayŏ oei xa hơƀăp lơ̆m hơtŏk tơ iung tenh, kơjăp xơđơ̆ng kơ teh đak; plang trong jang hơdăh, trŏ ƀlep vă tơplih tơdrong tơm lơ̆m hơtŏk joh ayŏ oei xa hơƀăp, kon bơngai Việt Nam.

          Tơroi tơ̆ Hop akŏm hơdăh: Joh ayŏ Việt Nam jing tơdrong đei jơnei đơ̆ng kơ rơbâu xơnăm pơm jang, gơh rơgei, tơjră nuih mơng tơ iung pơjing păng vei lăng teh đak, jing tơdrong đei jơnei lơ̆m akŏm păng chih iŏk tơdrong rơgei đơ̆ng lơ tơdrong gơh rơgei lơ̆m kơpal teh đak vă hơnơ̆ng keh kong dơh po. Đơ̆ng rŏng 35 xơnăm tơplih 'nao kơ teh đak, tôm kon pơlei lơ̆m tơpôl tơrĕk truh pơtho pơhrăm kon bơngai keh đang đơ̆ng oei 'lâ̆p, tơ̆ rim jăl hŏk; tơguăt hăm pơtho chư, pơhrăm kon bơngai, pơhrăm tơdrong hơbĕch hơƀăp erih xa. Pơma ăh hop akŏm, Ƀô̆ trưởng Anih tơm Joh ayŏ Tơplŏng kơdâu păng Tơmang pơhiơ̆ Nguyễn Văn Hùng xơkơ̆t: Kơjă đon bơnôh juăt jue đei vei răk tơƀăk mong, tơplih 'nao kiơ̆ hơyak trŏ ƀlep hăm tơdrong jang 'nao mŭk drăm, jang hadoi lơ̆m kơpal teh. Lơ mŭk drăm joh ayŏ đei pôk pơ ư. Mŭk drăm joh ayŏ erih xa hơƀăp kon kông đei tơrĕk truh, vei răk tơƀăk mong, mă hăt noh xơnong vei lăng hăt hot joh ayŏ kon pơlei kon kông:  “Lơ̆m tơdrong akŏm joh ayŏ Việt Nam đơ̆ng rŏng 35 xơnăm tơplih 'nao ăn ƀôh, đon kơchĕng găh joh ayŏ oei xa hơƀăp lơ̆m  tơpôl, kon bơngai roi năr roi keh kong, rơgei hloh. Đon kơchĕng, trong erih – tơdrong tơm kơ joh ayŏ hlôi đei dôm tơdrong tơplih hơ iă; tơdrong pơkăp đơ̆ng khôi luơ̆t găh joh ayŏ pơtoi đei keh đang, pơm trong hiôk ăn kon pơlei vang jang tơbang tơdrong rơgei po păng pơyua joh ayŏ... Tơpă ăn ƀôh, lơ̆m khei năr teh đak oei tơnap tap noh dôm kơjă joh ayŏ 'lơ̆ng rŏ kơ kon pơlei đei tơ iung păng hơtŏk pran; đon băt kơ teh đak, tơdrong tơgŭm dih băl, erih dăp đon dăp bơnôh, ƀenh kơ um ai joh ayŏ Việt Nam roi ang hơdăh hloh”.

          Tơ̆ hop akŏm, tang măt ăn KHul kơpal plei tơm Hà Nội; dêh char Thừa Thiên Huế păng dêh char An Giang hlôi tơbang hơdăh tơdrong đei jơnei păng ƀai hŏk kăp gĭt lơ̆m hơtŏk kơjă joh ayŏ, lơ̆m hơtŏk tơ iung mŭk drăm – tơpôl. Tang măt ăn dôm bơngai hŏk kơjung, bơngai jang khoa hŏk păng bơngai jang găh joh ayŏ hlôi ră hơdăh joh ayŏ - kon bơngai tơdrong tơm vei xơđơ̆ng ăn hơtŏk tơ iung kơjăp kơ Việt Nam. Giáo sư, Tiê̆n sih Khoa hŏk Vũ Minh Giang, Kơdră Jơnŭm Khoa hŏk păng Pơtho Pơhrăm, Đăi hŏk Kuôk ya Hà Nội ră hơdăh găh tơdrong tơm đei jơnei lơ̆m tơdrong hơtŏk teh đak jơnap noh tơ iung tơdrong hơpơi 'meh kơ hơdrung kon bơngai. Tơdrong hơpơi 'meh gô hơ 'nhăk tơdrong lui păng gô pơjing dôm tơdrong pran lơ̆m lăm jing jơhngơ̆m pran hloh:  “Trong jang kăp gĭt mă blŭng athei tơplih đon kơchĕng đơ̆ng tơm. Adrol hloh noh athei băt hơdăh găh pơkăp joh ayŏ ưh adrô̆ jing minh tơdrong jang mă bơ̆n athei hlôh vao joh ayŏ pơm tơm kơ đon kơchĕng lơ̆m tơpôl jing pơhngol dơnơm kơ minh hơdrung bơngai. Lơ̆m khei năr âu, joh ayŏ ưh adrô̆ jing mŭk drăm vă bơ̆n vei răk tơƀăk mong, pơ ư pơ ang mă athei đei lăng jing jơhngơ̆m pran kơ teh đak vă gơh pơih xă jang hadoi păng tơgar jang tơnăp lơ̆m tơdrong jang kơpal teh”.

          Pơma ăh Hop akŏm, Phŏ Thủ tướng Vũ Đức Đam adoi ră hơdăh, tơdrong pơkăp Trong jang joh ayŏ truh xơnăm 2030 athei tơ iung tơdrong hơpơi 'meh đơ̆ng tôm kon pơlei, pơtoi pơm trong dơnơm vă hơtŏk gơh rơgei, jơhngơ̆m pran tôm kon pơlei vă hơtŏk tơ iung tenh păng kơjăp. 'Meh jang đei tơdrong âu, dôm bơngai jang joh ayŏ athei tơpă gơh rơgei găh joh ayŏ đon bơnôh păng trong erih xa: “Rim bơngai đei bơnê guăng 'lơ̆ng, pơdrŏng, hŏk kơjung tơpă ưh đei hơ iă hăm nơ̆r bơnê erih joh ayŏ 'lơ̆ng tơnăp. Inh 'meh vă rim jăl jang, tơrĕk truh joh ayŏ dơnưp. 'Măn jơ ăn joh ayŏ tơnăp lơ hloh, akŏm lơ jơ 'năr hloh. Hơtŏk kơjă tơnăp joh ayŏ kon pơlei Việt Nam. Bơ̆n ưh đei pơno, mă lei hơtŏk pơ 'lơ̆ng găh tơdrong pơ ư pơ ang kơ hơdrung hơdrĕch kon bơngai. Bơ̆n lui ngeh tơ iung pơjing păng hơtŏk teh đak jơnao rơgei hơƀăp jing tơdrong kăl kơ joh ayŏ Việt Nam ang hơdăh, hrau atŭm hăm tơdrong gơh rơgei kơ kon bơngai”.

          Đơ̆ng 6 ƀai hŏk hlôh vao đei chih akŏm, Hop akŏm erih Hơƀăp Joh ayŏ jâ̆p teh đak drơ̆ng nơ̆r pơkăp, xơkơ̆t tơlĕch trong jang tơm vă pơjing păng vei răk tơƀăk mong kơjă kăp gĭt, jơhngơ̆m pran kon bơngai Việt Nam lơ̆m khei năr truh. Lơ̆m noh akŏm pơjing hơƀăp joh ayŏ păng kon bơngai Việt Nam hơtŏk tơ iung tôm, xơkơ̆t găh hơƀăp – dơnưp – guăng 'lơ̆ng, hram tơdrong tơguăt kon pơlei, rơngei hiôk hian, khoa hŏk păng đon bơnôh 'lơ̆ng.

Ƀĭ thư trung ương Đảng, Kơdră Anih Tuyên yăo Trung ương Nguyễn Trọng Nghĩa ră hơdăh:  “Akŏm hơlen, xơkơ̆t păng tơlĕch pơjing kơjă kăp gĭt kơ teh đak, kơjă kăp gĭt kơ hơƀăp joh ayŏ, kơjă kăp gĭt kơ kon bơngai Việt Nam tơguăt hăm vei răk tơƀăk mong kơjă kăp gĭt unh hnam Việt Nam lơ̆m chăl 'nao. Tơrĕk pơjing kon bơngai Việt Nam hơtŏk tơ iung tôm tơdrong, mă tơm noh hơtŏk đon bơnôh băt 'mêm kơ teh đak, tơdrong pơ ư pơ ang kơ hơdrung hơdrĕch, tơdrong erih, đon bơnôh, trong erih xa. Tơguăt tơ iung pơjing, pơhrăm đon bơnôh hăm pơm kiơ̆ tơnăp xơnong kơ kon bơngai, xơnong pơm jang dơnơm kơ kon pơlei".

Lan chih păng pơre nơ̆r