VOV4.Bahnar  – Jô̆ đơ̆ng 6 jơ truh 12 jơ 'năr dơ̆ng năr 24/5, Việt Nam đei dơ̆ng 33 'nu ƀơm jĭ COVID-19, lơ̆m noh đei 28 'nu tơ̆ dêh char Bắc Giang, 44 'nu tơ̆ Hải Dương păng 1 'nu tơ̆ Đà Nẵng. 28 'nu ƀơm jĭ đei ƀôh lơ̆m tơring oei tơklăh, đei tơrĕk truh Anih hơbuh jĭ kơ Tơring jang Quang Châu, Vân Trung, Đình Trám. Jô̆ truh năr 12 jơ năr 24/5, Việt Nam đei akŏp 3.823 'nu bơngai ƀơm jĭ lơ̆m teh đak păng 1.485 'nu mơ̆t đơ̆ng teh đak đe. Kiơ̆ kơtơ̆ng ang đơ̆ng Anih Hơmet jĭ păng Khul hơlen hơmet bơngai ƀơm jĭ COVID-19 hlăm, jô̆ truh pơgê năr 24/5, Việt Nam tŏk bŏk hơmet ăn 2.258 'nu bơngai jĭ COVID-19, lơ̆m noh đei hloh 50% kơsô̆ bơngai jĭ ưh đei ƀôh gru jĭ kiơ. Thư̆ trưởng Anih tơm Y tê̆ Nguyễn Trường Sơn xơkơ̆t tơdrong hơbuh jĭ 'măng mă âu pha hăm 'măng hơbuh jĭ tơ̆  Đà Nẵng. Tơ̆ Đà Nẵng, mă lơ noh bơngai jĭ hlôi hlăm yuơ đơ̆ng jĭ plei lĕn dăh mă ƀơm tơdrong jĭ nai hlôi đunh. Mă lei, 'măng hơbuh jĭ âu, yuơ tơplih yŏng đei đơ̆ng teh đak Ấn Độ, 'nguaih kơ tơdrong tơpoh jĭ tenh, minh ƀar bơngai jĭ mơlôh, ưh đei tơdrong jĭ nai mă lei jing jĭ hlăm, đei hơmet dui jơhngơ̆m hăm oxy, dui jơhngơ̆m hăm kơmăi.

Lan chih păng pơre nơ̆r