VOV4.Bahnar - Tơ̆ hơnăp jĭ hơbŭh pơrăm kơtang, hăm măt bơngai tơpŏh jĭ Covid-19 roi năr roi lơ, lơ̆m năr 5/1, Kơdră chĕp pơgơ̆r Dơnŏ anĭh vei lăng kon pơlei kơ pơlei tơm Đà Lạt (Lâm Đồng) hlôi tơchơ̆t pơjing 16 hơnĭh jang pơgang năm iung jang tơ̆ rim tơring, phương kơ pơlei tơm.

Yă Trần Thị Vũ Loan, Kơ iĕng Kơdră chĕp pơgơ̆r Dơnŏ anĭh vei lăng kon pơlei kơ pơlei tơm Đà Lạt tơbăt, tơdrong pơjing rim hnam pơgang năm iung jang jing tôch gĭt kăl vă vei lăng năng tông jơhngơ̆m jăn ăn bơngai jĭ ming hơmet jĭ Covid-19 tơ̆ hnam, adoi iung jang tơ jră tang găn hloi tơ̆ tơring lơ̆m khei ‘năr đei jĭ hơbŭh pơrăm kơtang. Jô̆ truh dang ei, pơlei tơm Đà Lạt đei 2.200 ‘nu bơngai tơpŏh jĭ Covid-19, lơ̆m au găh lơ hlôi đei ming hơmet klăih păng ăn brŏk tơ̆ hnam. Dang ei pă 784 ‘nu bơngai jĭ tŏk bŏk ming hơmet, lơ̆m au đei hlŏh 400 ‘nu bơngai jĭ ming hơmet tơ̆ hnam; 8 lơ̆m 16 tơring phương kơ pơlei tơm đei jĭ hơbŭh Covid-19 pơrăm kơtang hlŏh.

Tơblơ̆ nơ̆r: Amazưt