VOV4.Bahnar – Hnam ưh adrô̆ jing anih oei kơ dôm bơngai lơ̆m unh hnam mă oei jing anih pơgơ̆r tơdrong xoi tơbeh kơ yang hơpang đơ̆ng kon pơlei. Yuơ noh, rim ‘măng bơ̆ hnam đang, bơngai M’nông tơ̆ groi kông M’nông hơnơ̆ng pơgơ̆r xoi tơbet tŏk oei hnam ‘nao, hăm dôm khôi juăt jue ƀenh kơ um ai hơdrung kon kông, đei lơ kơjă kăp gĭt kơ hnưr kon bơngai.

Kiơ̆ kơ noh, đơ̆ng rŏng kơ bơ̆ hnam đang, tơ ‘ngla hnam rơih khei năr ‘lơ̆ng vă xoi tơbeh tŏk hnam ‘nao. Tơmam plang noh minh pôm ier, 1 tơlôp đak, 1 kơtŏl ngar unh păng 1 tơm xik. Ăh tŏk hnam ‘nao, tơdrong mă blŭng rim unh hnam athei pơjing đei dôm Njeh (yang vei hnam). Njeh noh minh djoi pơle, ƀar păh đei jĭt ‘nhueng đei tơlei, găh kơpal chŭt klơm ier păng 1 pôm klơm nhŭng. Njeh đei chŭt kơtă ăh hơla ‘măng mơ̆t lĕch păng noh jing yang Kuắt kơ bơbŭng hnam ‘nao. Đơ̆ng rŏng kơ pơjâu ‘măn tơlôp đak tơ̆ anăp ‘măng hnam vă apinh yang hnam axong tŏk oei hnam ‘nao noh dôm bơngai kiơ̆ đơ̆ng rŏng gô ‘nhăk ba 1 tơlôp đak, minh ƀar găr hơdrĕch atŭm hăm 1 kơtŏl ngar unh tŏk oei hnam ‘nao. Păng tôm bơngai lơ̆m unh hnam ‘nhăk tơmam drăm mơ̆t lơ̆m hnam.

Đơ̆ng rŏng kơ tơmam drăm đei ‘nhăk tơmơ̆t lơ̆m hnam, tơ ‘ngla hnam gơnơm bơngai đei unh hnam rơgei, jang xa hơbĕch pơgiơ̆ng unh pơtih vă hơ ‘nhăk hơyuh ‘lơ̆ng ăn unh hnam. Nơ̆r xơkat adrol kơ pơgiơ̆ng unh nhen tơ̆ hơla: “Inh apinh yang unh, yang tơnuh hơnơ̆ng tơ̆k ang hơdăh unh vă ngir tơnŏ kơ hnam ‘nao. Apinh đe yang pŭn ai tơgŭm ăn dôm bơngai lơ̆m unh hnam grăng pran ling lang, hơnơ̆ng tơguăt tơguăl, ‘mêm kơ eng tơguăt hăm dih băl…”.

Đơ̆ng rŏng kơ xoi tơbeh kơ khul pai xa, tơ 'ngla et xoi gô kăt pham ier păng iŏk pham kon tơrong xoi plang lŭk lơ̆k lơ̆m tơdrô, iŏk pik ăh tơm Njeh păng dôm tơmam yua lơ̆m hnam. Pik răh xơkat răh: “Inh xơkat apinh yang Kuắt. Inh xơkat apinh  yang tơnuh unh, yang vei hnam. yang Giun Ngo. Inh xơkat apinh yang đak, yang pơga... Inh iŏk pham kon tơrong plang lŭk lơ̆k hăm xik vă pik ăn tôm tơmam yua lơ̆m unh hnam păng hơpơi ăn tôm tơmam yua gô tơguăt atŭm hăm kon xâu lơ̆m unh hnam. Apinh yang dơnưp pring vei ăn kon xâu lơ̆m hnam grăng pran ling lang. Jang mir đei ƀa ƀenh xum, đei erih xơđơ̆ng, jơnap. Apinh yang hơpang păng yang dơnưp truh tơ oei atŭm hăm nhôn vă et xa, xŏng por prung, 'nhĕm ƀuh... Ơ Yàng!...”.

Pơtôch tơdrong et xoi, kră pơlei iŏk tơdrô ge ăn kơ tơ 'ngla hnam et adrol, đơ̆ng rŏng kơ noh tơm hnam pơtơm hơvơn kra pơlei atŭm hăm kon xâu lơ̆m unh hnam chă et xa. Đe kră noh hô tơroi ăn kon xâu mơ̆ng tơdrong kăp gĭt kơ khôi et tŏk hnam 'nao păng dôm bơngai đei ƀơ̆r hri hiôk noh gô hri thơ thâu hơ iă ăn tơm hnam.

Ƀok Điểu M’rưng oei tơ̆ pơlei Đak R’moan, xăh Đak R’moan, thĭ xăh Gia Nghĩa ăn tơbăt: “Khôi xoi tơbeh tŏk oei hnam 'nao kơ bơngai M’nông 'nguaih kơ tơdrong thơ thâu ăn unh hnam, kơtum kơtŏng gơh grăng pran, jang xa đei yua lơ oei đei kăp gĭt lơ̆m tơdrong pơtho rim bơngai băt hơdăh kơ dôm kơjă kăp gĭt kơ tơdrong pơm jang, tơgĭt găh đon bơnôh 'nhŏng oh bôl boăl, kon pơlei. Tơdrong et xoi tŏk hnam 'nao kơ bơngai M’nông ưh adrô̆ lơ̆m unh hnam mă oei đei hloi đe tơmoi, bơngai juăt tơ̆ dôm pơlei pơla tơjê̆. Kon pơlei truh tơ̆ âu atŭm et tơdrô, tơroi dih băl, pơhlai tơdrong tơhĭl, thơ thâu băl dôm tơdrong 'lơ̆ng rŏ, jơhngơ̆m pran, pơyan jang đei yua, pơlei pơla hơtŏk tơ iung”.

Lan chih păng pơre nơ̆r