VOV4.Bahnar - Truh dang ei oei đei truh 7 triệu 600 rơ bâu jrŭm ƀet bơ̆ng jĭ Covid-19 lơ̆m khŭl linh păng kon pơ lei tam mă đei tơ mơ̆t lơ̆m kơ măy ƀơm ưh kơ ‘lơ̆ng truh tơ drong asong hộ chiếu vaccine păng tơ drong tơ plih kơ sô̆ teh đak. ‘Noh jĭ kơ tơ̆ng ang đei tơ roi tơ̆ Hop akŏm trực tuyến lơ̆m teh đak jang kiơ̆ tơ drong “ pơm pơ goh” hla ar chih răk ƀet vaccine bơ̆ng jĭ Covid-19 yua đơ̆ng Anih tơm vei lăng găh jang pơ gang jang hơ dai hăm Anih tơm vei lăng Kŏng an pơ gơ̆r pơ gê ‘năr 26/4, tơ̆ Hà Nội. Tơ drong tơm hơ nhăk truh tơ drong ‘nao tơ roi kơ pal ‘noh jĭ yua đơ̆ng dôm hơ nih ƀet bơ̆ng tam mă chih tơ mơ̆t tơ tom tôm tơ drong kơ tơ̆ng ang đơ̆ng bơ ngai ƀet vaccine Covid-19 lơ̆m kơ măy. Kơ tơ̆ng ang lơ̆m hla ar chih răk đơ̆ng hơ nih ƀet tam mă lei lăi hăm anih chih răk hla ar kơ teh đak găh kon pơ lei oei sa. Anih tơm vei lăng Kŏng an tơ roi rơ dăh, hla ar chih răk kơ teh đak găh kon pơ lei oei sa ‘noh lăng kiơ̆ ‘lơ̆ng hloh vă pơm lei lăi kơ tơ̆ng ang găh ƀet vaccine bơ̆ng jĭ Covid-19 kŭm nhen dôm tơ drong kơ tơ̆ng ang nai đơ̆ng kon pơ lei, yak truh pơ vih pơ văn tơ plih kơ sô̆ kơ teh đak. Anih tơm vei lăng găh jang pơ gang tơ băt, yak truh hŭt tơ drong roi tơ băt y tế lơ̆m teh đak yua kơ hrei ‘nâu ưh pă pơm kiơ̆ tơ chă F0, F1. Mă lei oei pơ vei roi tơ băt y tế hăm tơ moi đơ̆ng teh đak đe mơ̆t tơ̆ Việt Nam.

Thuem: Tơ blơ̆