Hăm dôm tơnap tap noh, Anih jang găh Kon kông dêh char Đăk Lăk hlôi yak hadoi hăm dôm Anih jang hơtŏk pran tơroi tơbăt, hơvơn kon pơlei hơtŏk hlôh vao lơ̆m jang tang găn pơrang jĭ; jang hadoi hăm anih jang y tê̆ pơtho kon pơlei pơm kiơ̆ ƀlep dôm pơkăp găh tang găn păng tơjră pơrang jĭ COVID-19. Gơnơm thoi noh, pơrang jĭ COVID-19 tơ̆ Đăk Lăk hlôi kĕ tang găn, kon pơlei chôt vih hăm tơdrong erih xơđơ̆ng. Tơdrong apĭnh jet pơma dơnuh hăm ƀok Hà Huy Quang, Phŏ Kơdră Anih jang găh Kon kông dêh char Đăk Lăk pơm hơdăh hloh dôm tơdrong đei jơnei lơ̆m tơdrong jang âu.

- Ƀok ăi, apĭnh ih ăn tơbăt dôm tơdrong jang mă Anih jang găh kon kông dêh char hlôi tơlĕch jang lơ̆m khei năr mă dêh char Đăk Lăk tơjră hăm pơrang jĭ COVID-19 hơbuh hli?

Ƀok Hà Huy Quang: “Xơnăm 2020, 2021 hăm tơdrong mă pơrang jĭ COVID-19 hơbuh hli hlơt lơ̆m tơring kơ dêh char, mă kăl hăm dôm thôn, pơlei kon kông, băt hơdăh tơdrong noh, Anih jang găh kon kông dêh char hlôi tơtom tơgŭm ăn Anih vei lăng kon pơlei dêh char chih akŏm Pơkăp pơgơ̆r rim anih jang găh kon kông hơtŏk pran tơroi tơbăt, tang găn păng tơjră pơrang jĭ Covid-19 lơ̆m tơring kon kông lơ̆m jâ̆p dêh char, mă kăl noh dôm thôn pơlei ƀơm răm hlăm đơ̆ng pơrang jĭ. Kiơ̆ dôm trong tơlĕch tơroi tơbăt nhen axong kơtah hla bar, chih tơbang pa nô păng hơvơn bơngai mă kon pơlei lui yom năm truh rim hnam chă tơroi, hơvơn kon pơlei tơring kon kông pơm kiơ̆ kơjăp pơkăp tang găn păng tơjră pơrang jĭ Covid-19 kiơ̆ tơlĕch tơchơ̆t đơ̆ng anih jang y tê̆; gơnơm đơ̆ng noh pơrang jĭ Covid-19 lơ̆m tơring kon kông dar deh đei tang găn, tơjủ kơđeh hloh tơdrong răm hăm tơdrong erih kon pơlei, hơ ‘nhăk tơdrong erih kon pơlei dar deh xơđơ̆ng, akŏm pơm jang, hơtŏk mŭk drăm.

- Ƀok ăi, jăh vă xơkơ̆t ‘noh,  vaccine jing tơmam dơnơm kăp gĭt lơ̆m tơdrong jang tang găn păng tơjră pơrang jĭ COVID-19. Mă lei, ăh mă pơrang jĭ da ƀiơ̆, lơ kon pơlei tơ̆ Đăk Lăk đei đon tơchĕng pơhơi pơhŏ, ưh đei tơnăp lơ̆m tơdrong chă ƀet vaccine bơ̆ng jĭ COVID-19, hăm tơdrong đei ƀôh âu, Anih jang Kon kông hlôi đei trong jang ayơ vă tơroi, hơvơn kon pơlei năm ƀet bơ̆ng jĭ hă ƀok?

Ƀok Hà Huy Quang: Jăh vă tơchơ̆t noh, tơdrong ƀet vaccine bơ̆ng jĭ  covid-19 jing mam bơ̆ng xĭt hloh lơ̆m tơdrong jang tơjră pơrang jĭ; nhen bơ̆n hlôi ƀôh lơ̆m jăl mă blŭng gơnơm đei trong jang trŏ ƀlep, tơtom đơ̆ng dôm jăl pơgơ̆r tơring, mă kăl noh tơdrong jang “Hơtŏk vaccine” hơbĕch hơbal đơ̆ng Đảng, Khul Kơpal teh đak bơ̆n hlôi đei minh kơsô̆ vaccine lang lap tơtom vă ƀet bơ̆ng jĭ ăn kon pơlei tơ̆ dôm tơring tơm mă pơrang jĭ hơbuh hli, gơnơm đơ̆ng noh mă pơrang jĭ dar deh đei tang găn, kơsô̆ bơngai lôch kơyươ ƀơm tơjủ ƀôh hơdăh, tơdrong erih kon pơlei vih xơđơ̆ng ƀiơ̆; đơ̆ng noh pơjing ăn kon pơlei đei đon kơchĕng tơnăp hloh, mă hăt lơ̆m tơring kon pơlei kon kông mă pơhơi pơhŏ, ưh đei tơklep hăm tơdrong ƀet vaccine. Băt hơdăh tơdrong noh, kiơ̆ tơdrong pơtho đơ̆ng anih jang y tê̆ dôm jăl, Anih jang găh kon kông dêh char hlôi kơchăng jang hadoi hăm Rađiô nơ̆r pơma Việt Nam tơ̆ tơring Tây Nguyên păng Rađiô rapor pơdăh um rŭp Đăk Lăk tơlĕch tơroi tơbăt găh tang găn păng tơjră pơrang jĭ hăm lơ nơ̆r phar băl, pơre nơ̆r lơ̆m Rađiô rapor kơ dêh char păng tơring hơtŏk pran tơdrong tơroi tơbăt vă hơtŏk hlôh vao ăn kon pơlei tơring kon kông băt hơdăh găh tơdrong kăp gĭt đơ̆ng chă ƀet vaccine bơ̆ng jĭ Covid-19 lơ̆m tơdrong jang tang găn păng tơjră pơrang jĭ Covid-19, hơvơn kon pơlei tơring kon kông vang akŏm ƀet vaccine bơ̆ng jĭ covid-19 tơtom, tôm măh. Kiơ̆ kơ noh, đơ̆ng tơbang hơkŏp đơ̆ng Anih jang y tê̆ truh dang ei tơdrong ƀet vaccine bơ̆ng Covid-19 hăm rim khul bơngai đei jơnei kơjung hloh; tơgop pơm tơjur pơrang jĭ Covid-19 lơ̆m jâ̆p dêh char

- Nhen ih ‘nao tơroi găh tơdrong jang hadoi hăm rim anih jang tơroi tơbăt, ƀăo chĭ vă đei lơ trong chă tơroi hơtŏk hlôh vao ăn kon pơlei băt lơ̆m tơdrong jang tang găn păng tơjră jĭ COVID-19, ƀok Hà Huy Quang xơkơ̆t tho yơ găh nơ̆r pơma đơ̆ng bơngai mơ̆ng brŏ, păng lơ̆m khei năr truh, Anih jang găh Kon kông dêh char Đăk Lăk gô đei dôm tơdrong jang hadoi thoi yơ, vă gơh tơroi tơbăt tôm tơdrong găh pơkăp asong ăn tơring kon pơlei kon kông:  

Ƀok Hà Huy Quang: “Noh duh jing minh tơdrong hơ iă păng đei jơnei kăp gĭt lơ̆m tơdrong tơroi tơbăt tang găn păng tơjră pơrang jĭ COVID-19 hăm tơdrong jang hadoi hăm Anih jang ƀăo chĭ kơ Trung ương adoi nhen tơ̆ tơring vă hơtŏk hlôh vao, xơnong jang kơ kon pơlei lơ̆m tơdrong tang găn păng tơjră pơrang jĭ. Chĕp vei dôm tơdrong đei jơnei, tơdrong jang tơroi tơbăt tang găn păng tơjră pơrang jĭ covid-19 lơ̆m khei năr truh kăl akŏm lơ̆m minh ƀar tơdrong jang hơdăh noh: Pơtoi jang hadoi hăm dôm anih jang tơroi tơbăt nhen Rađiô nơ̆r pơma Viêt Nam tơring Tây Nguyên (VOV), Rađiô rapor păng pơdăh um rŭp dêh char hơtŏk jơ pơih rapor hơnơ̆ng hloh, pơih xă hloh ăn tơring kon pơlei kon kông; mă kăl iŏk yua xơnong jang kơ Bơngai đei kon pơlei lui yom vă hơtŏk tơdrong tơroi tơbăt găh tang găn păng tơjră pơrang jĭ, tơgŭm kon pơlei lơ̆m tơring kon kông băt hơdăh, trŏ tơdrong kăp gĭt kơ tơdrong xĭt đơ̆ng ƀet vaccine bơ̆ng jĭ, pơtoi kơchăng pơm kiơ̆ pơkăp tang găn păng tơjră pơrang jĭ: Chô̆ che gom ƀŏ, pơlôch xơmach, vaccine, pơgang, hơmet jĭ, trong pơkăp pơm kiơ̆ pơtho đơ̆ng anih jang y tê̆ dôm jăl; tơguăt hăm tơdrong tơlĕch jang tơnăp tơdrong jang kon kông păng pơkăp hăm bơngai kon kông lơ̆m tơring, mă kăl, tơlĕch jang tơnăp Tơdrong pơkăp kơ teh đak găh hơtŏk mŭk drăm – tơpôl tơring kon pơlei kon kông păng groi kông jăl xơnăm 2021-2030. Tơgop hrôih tơpuh lê̆ pơrang jĭ Covid19, akŏm hơtŏk mŭk drăm, hơtŏk tơdrong erih, vei xơđơ̆ng tơpôl chĭn trĭ păng xơđơ̆ng tơpôl tơ̆ tơring kon pơlei kon kông; pơhơtŏ tơdrong erih jang xa đơ̆ng kon pơlei tơring kon kông hăm kon pơlei kinh, đơ̆ng tơring pơxĕl hăm tơring kơdrâ̆m"

 - Ŏ ăh bơnê kơ ih ƀok hơ!