Kiơ̆ kơ yă Phạm Thị Thùy Trang, Kơdră pơgơ̆r Khŭl vei lăng drŏ kăn apŭng Ba Chẽ, jĭ tơring mơmat tat hloh kơ dêh char Quảng Ninh, hơnih akŏm lơ bơngai kon kông hơrih sa, tơdrong “tơplih đon tơchĕng, trong jang” tơgop hŭt lê̆ tơchĕng ưh kơ hơtŏ găh drŏ nglo hăm drŏ kăn, tơdrong joăt so ưh kơ ‘lơ̆ng lơ̆m ŭnh hnam păng tơpôl tơ̆ Ba Chẽ tơƀơ̆p ưh kơ tŏ sĕt mơmat tat yua đơ̆ng găh lơ kon pơlei kon kông tơ̆ âu iŏk yua mŭk drăm ŭnh hnam oei tŏ sĕt, tơdrong hŏk, băt jang, hlôh vao oei thoi kră sơ̆, đon tơchĕng ưh kơ hơtŏ găh drŏ nglo hăm drŏ kăn hơdai hăm 1,2 tơdrong joăt đơ̆ng kon pơlei oei pơdê găh drŏ nglo hăm drŏ kăn tôch kơ trăp.

Yă Phạm Thị Thùy Trang, Kơdră pơgơ̆r Khŭl vei lăng drŏ kăn apŭng Ba Chẽ roi tơbăt: Hrei ‘nâu lơ drŏ kăn păng hơioh drŏ kăn bơngai kon kông lơ̆m apŭng Ba Chẽ tơƀơ̆p lơ mơmat tat lơ̆m tơdrong hơrih sa kŭm nhen sơkơ̆t hơdăh hơnih dơ̆ng, hơtŏk tơiung kơdih kâu yua đơ̆ng lơ tơdrong tơchĕng rok kră sơ̆, tơdrong joăt pơgŏ. Tơdrong iŏk ŭnh ôm hrôih, teh dong băl lơ̆m ŭnh hnam, vă kơ drŏ nglo, koă kơ drŏ kăn kŭm hăm dôm tơdrong joăt lơ̆m oei sa ƀơm ưh kơ ‘lơ̆ng truh cham char hơrih păng jơhngơ̆m pran kơ kon pơlei...  Tơdrong tơlĕch jang “tơplih đon tơchĕng, trong jang” vă tơgop hŭt lê̆ tơchĕng ưh kơ hơtŏ găh drŏ nglo hăm drŏ kăn păng hơnăp jang lơ̆m ŭnh hnam păng tơpôl tơ̆ Ba Chẽ tơƀơ̆p ƀơm dôm tơdrong mơnat tat.  

Tơ̆ hơnăp dôm tơdrong mơmat tat hơdrô̆, Khŭl vei lăng drŏ kăn apŭng Ba Chẽ tŏk bŏk akŏm hơmet pơ ‘lơ̆ng vă ƀrư̆ ƀrư̆ tơplih đon hlôh vao đơ̆ng kon pơlei. 1 lơ̆m dôm tơdrong jang hơdăh, ‘noh jĭ tơlĕch jang dôm trong jang tơm bơ̆jang kiơ̆ tơplih ‘nao kiơ̆ trong: Tơroi tơbăt xă truh rim pơlei, krao hơvơn jrŭ truh rim ŭnh hnam. Hơdai hăm hơtŏk ‘lơ̆ng hŏk hôp khŭl, grŭp tơroi tơbăt hăm pơgơ̆r tơplih ‘nao dôm ‘măng hŏk hôp tơdrong jang găh pơm kiơ̆ hơtŏ băl drŏ nglo hăm drŏ kăn. Tơdrong hŏk hôp ‘nâu kiơ̆ trong: Pơgơ̆r tơdrong pơlong kiơ̆ hơnăn; Pơgơ̆r dôm tơdrong jang joh ayŏ, kơdŏ soang, tơ plŏng kơdâu đơ̆ng rim khŭl grŭp; Hơtŏk loi dơ̆ng bơ̆jang grŭp tơ̆ dôm jơ hŏk hôp. Pơjing dôm grŭp jang kiơ̆ ‘meh vă đơ̆ng bơngai lơ̆m khŭl. Dôm ‘măng tơroi tơbăt, hŏk hôp adoi hơvơn hloi klo kăn vang akŏm.

Yă Phạm Thị Thùy Trang roi tơbăt dơ̆ng: Hơdai hăm ‘noh, nhôn yak hơdai, tơgŭm mŏ oh lơ̆m hơtŏk tơiung mŭk drăm yak tŏk klăih đơ̆ng dơnuh hin kơjăp. Hơdai hăm tơdrong hơtŏk jơhngơ̆m đon tơgŭm, ‘mêm băl, tơlĕch jang dôm tơdrong jang tơgŭm drŏ kăn dơnuh hin, mơmat tat, hơtŏk ‘lơ̆ng tơdrong gơh jang mŭk drăm ăn drŏ kăn. Mă loi ‘noh, nhôn akŏm hơtŏk ‘lơ̆ng đon hlôh vao, kĕ jang, ƀrư̆ ƀrư̆ vei sơđơ̆ng tơdrong vang jang hơtŏ băl đơ̆ng drŏ nglo hăm drŏ kăn lơ̆m tơdrong jang pơtho pơhrăm, vei sơđơ̆ng hơtŏ băl drŏ nglo hăm drŏ kăn lơ̆m gơh yua păng sa yua dôm tơdrong pơvih pơvăn vei lăng jơhngơ̆m pran rơneh, tang găn rơneh kon lơ lơ̆m ŭnh hnam.

Hơdai hăm tơdrong jang tŭn pran dôm tơdrong jang pơtho pơhrăm, tơroi tơbăt, Khŭl vei lăng drŏ kăn apŭng Ba Chẽ hlôi pơjing 13 Grŭp jang drŏ kăn hăm khôi luơ̆t, 13 khŭl jang tơm bơ̆jang păng pơm kiơ̆ khôi luơ̆t; pơvei păng pơih să ‘lơ̆ng 8 grŭp jang rong pơtho kon ‘lơ̆ng, 07 grŭp jang pơm bơngai mĕ hăm vei lăng jơhngơ̆m pran rơneh păng pơm mĕ sơđơ̆ng, 08 tơdrong jang “Hơnih lui ngeh” tơ̆ tơpôl, jang kiơ̆ tang găn teh dong băl lơ̆m ŭnh hnam, teh dong băl đơ̆ng drŏ nglo hăm drŏ kăn tơ̆ tơring kon pơlei oei, 07 tơdrong jang “Pơjing ŭnh hnam 5 ưh 3 rơgoh”, 20 tơdrong jang “hơnih hơdăh 3 rơgoh”.

Mă loi ‘noh tơgŭm drŏ kăn hơtŏk ‘lơ̆ng tơdrong hơrih sa tơmam drăm păng jơhngơ̆m đon, Khŭl hlôi krao hơvơn, tơƀôh muh măt 01 grŭp jang “ Joh ayŏ păng chĕp vei tơdrong ‘lơ̆ng hơiă hơbăn ao hrŭk bơngai Dao Thanh Phán”, 08 grŭp jang păh ƀŏng lŏng hơ ‘iơch, 60/66 grŭp jang hơsoang tơplŏng kơdâu păng ‘nâu jĭ 1 lơ̆m dôm grŭp jang sơng đei lơ lap drŏ kăn, lơ bơngai, sơnăm pha băl vang akŏm hơnhăk ăn kơjă kăp gĭt găh jơhngơ̆m đon, jơhngơ̆m pran tih tên ăn kơ dôm bơngai jang lơ̆m khŭl. Hloh kơ ‘noh, mŏ oh vang jang lơ̆m grŭp jang hơsoang kră sơ̆ oei iŏk đei tơdrong tơgŭm, pơtrŭt pơm tơdrong hiôk găh jơ năr, tơdrong jang ŭnh hnam đơ̆ng klo, đe ‘nhŏng. Hăm đon tơchĕng, trong lăng ƀôh trŏ ƀlep, ưh pă đei trong lăng ưh kơ ‘lơ̆ng, tơchĕng trăp đơ̆ng tơdrong joăt so ưh kơ ‘lơ̆ng hăm drŏ kăn mưh vang akŏm dôm kơ loăi tơplŏng kơ dâu kiơ̆ chăl hle, hơiă.

Gơh ƀôh, apŭng Ba Chẽ hlôi jơnei lơ̆m tơdrong tơlĕch jang dôm tơdrong jang tơgŭm drŏ kăn, tơgop hơtŏk ‘lơ̆ng tơdrong hơrih sa păng pơtrŭt hơtŏ băl đơ̆ng drŏ nglo hăm drŏ kăn lơ̆m tơring. ‘Nâu jĭ tơdrong jang kăl vă hŏk pơhrăm păng pơih să.