Nhen tơdrong joăt, ‘năr 16 rim khei, ƀak si Y Nham Niê, Kơdră vei lăng hnam pơgang xăh Krông Na, apŭng Buôn Đôn ‘noh hơdai hăm đe kang ƀô̆, bơngai jang năm tơ̆ plei Đrăng Phốk, xăh Krông Na vă khăm jĭ, roi tơbăt jơhngơ̆m jăn ăn kon pơlei. Plei Đrăng Phốk oei hlom lơ̆m tơring hơdrô̆ Pơgar bri ‘long kơ teh đak York Đôn, hơtăih kơ Hnam pơgang xăh vă jê̆ 20 km, kơna tơdrong năm tơ̆ hnam pơgang xăh vă khăm jĭ tơƀơ̆p lơ mơmat tat. Rim ‘măng năm tơ̆ pơlei, ƀak si Y Nham ling lang tơgĕch tơroi tơbăt tơdrong jang tang găn jĭ ăn kon pơlei: “Lơ̆m tơring hơtăih hơtŏ âu ‘noh jĭ jăn lơ dêh, mă loi ‘noh jĭ chĕp pơ lŏ oei đei, thim ‘nao âu ‘noh dôm tơdrong jĭ nai ƀơm ưh kơ ‘lơ̆ng đơ̆ng tơring nai truh kŭm đei lơ. Đon băt kơdih đơ̆ng kon pơlei oei tam mă lơ, kon pơlei băt kơ jĭ ‘noh mă tơƀơ̆p ƀak si đĕch, oei tơdrong tang găn jĭ ‘noh đe oei tam mă gan băt.”

Sơ̆, dôm bơngai jang pơgang kơ pơlei athei năm tơ̆ rim hnam tơtă kơ kon pơlei năr khăm hơnơ̆ng rim khei, ‘noh dang ei, mưh truh ‘năr 16 rim khei, kon pơlei băt kơdih năm tơ̆ hnam hŏk hôp pơlei vă đei khăm păng roi tơbăt jơhngơ̆m jăn. Mŏ H’Thép Knul oei tơ̆ plei Đrăng phốk, tơbăt: “Ƀak si Nham năm tơ̆ âu khăm jĭ, roi tơbăt hăm pơlei pơla tơ̆ âu tôch kơ tơnăp, gơnang đơ̆ng ƀak si ‘noh pơlei pơla băt trong vei lăng jơhngơ̆m jăn.”

Jĭ bơngai Êđê arih sa păng tih vơ̆ lơ̆m groi teh xăh Ea Bar, apŭng Buôn Đôn, đơ̆ng rŏng hŏk đang tơdrong jang pơgang, sơnăm 2002, ‘nhŏng Y Nham Niê brŏk jang tơ̆ Hnam pơgang xăh Ea Bar. Đơ̆ng sơnăm 2016 truh dang ei, ƀak si Y Nham đei ăn năm jang pơm Kơdră vei lăng Hnam pơgang xăh Krông Na. Hloh 20 sơnăm tơklep hăm tơdrong jang păng hlôi đei 7 sơnăm bơ̆jang hơtăih kơ hnam hloh 20km, sư hlôh akhan tơdrong arih sa kơ kon pơlei tơring hơtăih hơtŏ, tơring sơlam tơƀơ̆p lơ mơmat tat; oei đei lơ tơdrong joăt so ƀơm kơ nê̆ truh jơhngơ̆m jăn kơ kon pơlei.

Hăm dôm tơdrong hlôh vao hlôi hŏk păng đĭ jơhngơ̆m hăm tơdrong jang, ƀak si Y Nham ưh kơ ‘nhoen trong nơnăm mơmat tat, ‘năr tŏ kŭm nhen ‘năr ‘mi, hơdrin hơdai hăm buăl jang hơdai păng khŭl jang pơgang tơgŭm krao hơvơn kon pơlei hŭt lê̆ tơdrong joăt so ưh kơ ‘lơ̆ng, roi tơbăt vei lăng jơhngơ̆m jăn rơneh, krao hơvơn mĕ ƀă hơioh ba kon năm ƀet bơ̆ng pơih să ƀlep khei ‘năr. Gơnang đơ̆ng tơdrong hơdrin đơ̆ng ƀak si Y Nham păng khŭl jang pơgang tơring, tơdrong jang vei lăng jơhngơ̆m jăn blŭng a ăn kon pơlei tơ̆ xăh Krông  Na iŏk đei lơ jơnei ‘lơ̆ng. Kơ sô̆ bơngai rơneh kon mă 3 păng tơdrong iŏk ŭnh tam tôm sơnăm, oei băl hơgăm tơ̆ tơring tơjur lơ, kơ sô̆ ƀet bơ̆ng pơih să iŏk đei 70%. Ƀak si Y Nham tơroi: “Jơhngơ̆m đon đơ̆ng ĭnh gĭt kăl hloh ‘noh jĭ vei lăng jơhngơ̆m jăn ăn rim bơngai, ưh kơ lăng pơ dê hơ nih ‘nâu hơnih to, kon pơlei kăl, teh đak ăn năm ‘noh ĭnh năm đĕch. Ĭnh ling lang hơdrin iŏk dôm tơdrong hlôh vao đơ̆ng kơ dih vă pơvih pơvăn ăn kon pơlei đĕch.”

Ưh khan lăp đĭ jơhngơ̆m lơ̆m tơdrong jang vei lăng jơhngơ̆m jăn ăn kon pơlei, hăm hơnăp jang ‘noh Kơdră vei lăng Hnam pơgang xăh, ƀak si Y Nham oei kơchăng tơlĕch trong jang hơdăh ăn rim tơdrong jang kơ hnam pơgang kiơ̆ rim giĕng, rim khei kŭm nhen kơ chăng lơ̆m tơdrong tơ dra hơdrol tơdrong jĭ jăn tơ̆ tơring vă đei dôm trong tơlĕch jang, tơgŭm tơtom hăm kơdră kơ pal. Hơdai hăm ‘noh, ƀak si Y Nham oei tôch kơ tơnăp pơtho ăn dôm bơngai jang lơ̆m hnam pơgang xăh vă đe sư hơtŏk ‘lơ̆ng jang hơgei. ‘Nhŏng Y Sới Hwing, Phŏ kơdră vei lăng Hnam pơgang xăh Krông Na tơbăt: “Ƀak si Nam ‘noh jĭ 1 ‘nu bơngai tôch kơ pơnam, bơ̆ jang tôch kơ tơnăp. Rim khei đơ̆ng rŏng kơ hôp chi bộ lai yơ ƀak si Nham kŭm tơlĕch ăn 1 tơdrong jĭ hơyơ ‘noh vă kơ tơroi tơbăt, vă kơ tơlĕch ăn 1 trong mưh tơƀơ̆p tơdrong đei ƀôh, sư kŭm hlôi pơtho hơdrol, tơdrong gơh jang đơ̆ng sư đei sư khŏm tơroi ăn kơ đe ‘nhŏng oh lơ̆m Hnam pơgang xăh, vă kơ mưh sư năm tơ̆ hơ yơ ‘noh ‘nhŏng oh lơ̆m Hnam pơgang gơh hơmet pơ ‘lơ̆ng đei.”

Dôm tơdrong plang jơhngơ̆m đơ̆ng ƀak si Y Nham Niê tôch kơ kăl lăng ‘lơ̆ng, sư ưh khan lăp jing 1 ‘nu ƀak si hơgei găh tơdrong jang, ƀĕnh jơhngơ̆m đon ‘lơ̆ng đĕch mă oei jing bơngai ‘lơ̆ng lơ̆m tơdrong jang pơgang tơring sơlam. Gơ nang đơ̆ng tơdrong pơm tơiung păng pơvei đei bưng ai vă pơm đei đon lui ‘mêm đơ̆ng kon pơlei hlôi tơgŭm ƀak si Y Nham tơ lĕch jang jơnei dôm Tơdrong jang pơgang kơ teh đak găh pơlei pơla 1 trong đei iŏk yua ‘lơ̆ng.