Lơ xơnăm kơ âu, đe hŏk trŏ tơ̆ Anih oei jang Hy vọng ăh anih kơsô̆ 82/198, trong  290 Kim Mã Ba Đình, Hà Nội hlôi juăt hăm um ai ƀak sih Đỗ Thúy Nga truh tơ̆ anih jang ăh 8 jơ pơgê 'năr mônh, 'năr pêng, 'năr pơđăm rim giĕng vă pơtơm tơdrong jang kơ anih jang noh pơtho ăn đe hŏk tro pơ-'lơ̆ng jơhngơ̆m jăn. Anih oei jang Hy vọng pơih 'măng đơ̆ng 7 jơ minh puơ̆t rim pơgê dang ei đei 53 hŏk tro đơ̆ng 36 khei truh 16 xơnăm ƀơm tơdrong ưh đei hlăng hơbal găh kơ̆l ‘ngok. Đei 12 bơngai pơtho vang pơtho tơ̆ 4 lăm hŏk hadoi hăm tơdrong tơgŭm đơ̆ng đe boăl sinh viên thư̆k tâ̆p păng năm jang kơdih đơ̆ng teh đak đe.  

Yă Đỗ Thuý Nga noh hnưr ƀak sih mă blŭng vih bơ̆ jang tơ̆ hnam pơgang apŭng Thạch Thất bơ̆ Kơdră khua hơmet jĭ đe hơ-ioh đang kơ noh vih pơm jang tơ̆ Anih vei lăng jơhngơ̆m jăn đe mĕ, đe hơ-ioh, Anih Pơtho Pơhrrăm tơring Ba Đình. Xơnăm 1998, ăh pơdơh kơ jang kiơ̆ pơkăp xơnăm yă păng unh hnam hlôi tơchơ̆t akŏm jơhngơ̆m vă pơih anih oei jang Hy Vọng: Khei năr bơ̆ hnam pơgang noh đei lơ hơ-ioh ƀơm tơdrong jĭ ‘ngok Nhâ̆t Bản  pơrăm ưh kơ ‘lơ̆ng truh tơ̆ ‘ngok noh đe hơ-ioh ưh đei hơbĕch hơbal nhen đe hơ-ioh nai. Inh ƀôh kơdih po tam mă jang keh xơnong jang kơ bơngai thâi pơgang, kơyươ noh inh kơ-‘nôh ăh pơdơh kơ jang kiơ̆ xơnăm pơkăp khŏm mă pơih đei lăm pơtho ăn đe hơ-ioh kăp gĭt âu, noh kon drăkăn inh axong mơng teh âu vă man hăm jên tĕch hnam tơ̆ Thành Công vă man pơjing anih oei jang âu.

Xơnăm 2002, Anih oei Hy Vọng đei tơ-iung pơjing, yă Đỗ Thuý Nga chih tơbang lơ̆m ƀăo vă rơih hŏk tro păng bơngai pơtho đang kơ noh tơdrong jang kơ anih oei pơhrrăm âu roi năr roi đei pơih xă. Ưh adrô̆ pơtho hŏk, anih oei pơhrăm âu adoi jing anih rong ‘me xŏng xa rim kơ năr ăn đe hŏk tro.

Hăm 53 hŏk tro hơven hơvo tŏk bŏk oei kiơ̆ hŏk prăt năr hăm jên hŏk đơ̆ng  2 trĭu 500 truh 5 trĭu hlj hăm minh ‘nu oh. Ƀak sih Đỗ Thuý Nga tơroi: hăm tơdrong đei yua thoi noh, anih oei pơhrăm athei axong mă trŏ ƀlep păng xơng iŏk dôm tơdrong tơgŭm găh jên hu vă pơtoi pơm jang:  Tơdrong pơngơ̆t kơ đon hloh kơ inh noh ‘meh hơtŏk jên khei jang ăn bơngai pơtho, bơngai jang, chŏng mă mưh hơtŏk noh athei iŏk jên hŏk lơ hloh. Mă iŏk jên hŏk lơ noh lơ unh hnam tơnap tap, adrô̆ hăm trong jang jên hu, inh ưh đei chĕp jên mă pơjao ăn kang ƀô̆ bơngai pơtho hơlen jang đĭ dôm tơdrong kăl, vă ăh đĭ khei noh duh keh đang, pơtih nhen axong jên yua tơnăp noh khei mă yơ oei rơkăh noh mưh mĕ ƀă hŏk tro tơnap tap noh tơjur jên hŏk ăn kơ đe yĕt.

Đơ̆ng rŏng 22 xơnăm tơ-iung pơjing truh dang ei, anih oei Hy Vọng hlôi pơtho păng hơmet ăn jê̆ 400 ‘nu hŏk tro hơven hơvo, ƀơm tơdrong ưh hơbăng hlăng ‘lơ̆ng găh kơ̆l ‘ngok. Hlôi đei lơ oh tŏk ‘lơ̆ng hơbĕch, pơtơm erih atŭm hăm tơpôl. Hăm dôm tơdrong tơgop ăn tơpôl, ƀak sih Đỗ Thuý Nga hlôi đei pôk hơnăn “Drăkăn Anih tơm gơh rơgei xơnăm 2022”. Tơdrong akŏm jơhngơ̆m hăm tơdrong jang kơ yă Nga hlôi iŏk đei tơdrong kŭp yom, ‘mêm bơnê đơ̆ng boăl boăl. Yă Lê Thị Thu, 72 xơnăm, pơtho tơ̆ Anih oei jang Hy Vọng lơ̆m 20 xơnăm kơ âu ăn tơbăt:  Ăh inh tơƀơ̆p duch Nga lơ̆m minh anih ‘nao, noh mă mônh găh đon bơnôh duch, duch jing bơngai đei đon bơnôh dơnưp. Pơtih nhen hơ-ioh kơseh hơdrap noh duch ‘nhăk tơmam drăm truh khăm hơlen ăn hơ-ioh păng axong pơgang. Hăm đon bơnôh kơ duch noh hơnơ̆ng pơm jang tơdrong kiơ ăn hơ-ioh noh duch jang đĭ jơhngơ̆m.

Hăm tôm tơdrong hlôh vao găh vei lăng jơhngơ̆m jăn, vei lăng pơgang, hơlen păng hơmet pơrang jĭ jăn păng pơtho pơhrrăm yă Đỗ Thuý Nga akŏm jơhngơ̆m ăn Anih oei jang Hy Vọng. Anih mă yă hlôi tơ̆k hơdăh găh tơdrong chơt hơ-iă, jơnap, hơpơi ‘moih hăm dôm unh hnam păng hăm đe hơ-ioh hơven hơvo trŏ hăm hơnăn "Anih oei jang Hy Vọng”.