VOV4.Bahnar - Vă sơđơ̆ng jơhngơ̆m pran jăng grăng akau ăn hŏk tro oei sa kơ ‘năr dơ̆ng, dơnŏ anĭh vei lăng Hnam trương pơtho pơhrăm Dak Lăk tok bŏk tơlĕch rim trong jang pơm sơđơ̆ng rơgŏh tơmam drăm sa tơ̆ rim hnam trương đei hnam gŏ pai sa ăn hŏk tro oei sa ‘năr dơ̆ng. Dang ei dêh char Dak Lăk đei dang 50.000 ‘nu hŏk tro sŏng sa tơ̆ kơ ‘năr dơ̆ng lơ̆m 180 hnam trương. Đơ̆ng blŭng sơnăm hŏk Dơnŏ anĭh vei lăng Hnam trương pơtho pơhrăm hlôi đei chĭh pơtrŭh hla bơar athei rim hnam trương đei hnam gŏ, atŏk kơtang bơ̆ jang vei lăng rơgŏh ‘lơ̆ng tơmam drăm sa.

Hnam gŏ tơ̆ Hnam trương jăl kơđĕh Ngô Quyền, pơlei tơm Buôn Ma Thuột

Hnam gŏ, Hơnĭh tĕch mơdro tơmam drăm tơ̆ rim hnam trương kăl tơ iung pơjing mă gơ glang, phơi rơngơp, đei ‘măng hơdrau vă tang găn roi păng mŭr măih au to. Dơnŏ anĭh vei lăng hnam trương pơtho pơhrăm jei hlôi iung jang hơdoi hăm hơnĭh jang pơgang dăr lăng rim tơdrong tơhơ̆t rơgŏh tơmam drăm sa păng pơgơ̆r ăn hŏk tro sŏng sa. Rim hnam trương đei hnam gŏ kăl đei hơnĭh jang pơgang drơ̆ng nơ̆r găh tơchơ̆t rơgŏh tơmam drăm sa.

Bơngai chĭh: Tuấn Long

Tơblơ̆ nơ̆r: Amazưt