VOV4.Bahnar - Kiơ̆ nơ̆r tơ roi ‘năr 4/8 đơ̆ng Anih vei lăng tơ drong jĭ jăn (CDC) kơ dêh char Dak Lak, tơ̆ dêh char ‘nao đei dơ̆ng 1 ‘nu bơ ngai lôch yoa jĭ pơ lŏ lĕch đe. ‘Nâu jĭ bơ ngai jĭ mă 2 lôch yoa jĭ pơ lŏ lĕch đe tơ̆ Dak Lak jô̆ đơ̆ng blŭng sơ năm truh dang ei.

Klơ̆p hơ met ƀôi mong đak păng pơ lôch klanh vă tang găn jĭ pơ lŏ lĕch đe

Bơ ngai jĭ lôch âu ‘nŏh V.V., rơ nĕh sơ năm 1968, tơ̆ Thôn 2, Thĭ trơ̆n Buôn Trấp, apŭng Krông Ana, dêh char Dak Lak. Kiơ̆ bơ ngai lơ̆m hnam bơ ngai jĭ, ‘năr 20/7, V.V. yuh tŏ hơ nơ̆ng, jĭ hơ âm hơ ăm ƀĕnh hơ kâu, hlôi huch kơ loăi pơ gang ưh băt hơ năn tơ̆ lăm khăm hơ met jĭ kơ dih mă lei ưh đei da ƀiơ̆.

Truh ‘năr 23/7, bơ ngai jĭ năm khăm păng ƀich tơ̆ hnam pơ gang Đa khoa Thiện Hạnh. Tơ̆ Hnam pơ gang Đa khoa Thiện Hạnh jĭ ưh da ƀiơ̆, kơ na chơ năm tơ̆ Hnam pơ gang Đa khoa Tơ ring Tây Nguyên hăm hla ar khăm chih akhan Jĭ pơ lŏ lĕch đe Dengue năr mă 7 jĭ tôch ăl. Truh 8 jơ 45 pơ nĭt kơ măng lơ̆m năr, bơ ngai jĭ đei chơ năm tơ̆ hnam pơ gang Chợ Rẫy, plt Hồ Chí Minh. Truh ‘năr 30/7, bơ ngai lơ̆m hnam apinh chơ brŏk, rok trong brŏk bơ ngai jĭ âu lôch. Jô̆ truh ‘năr 3/8, tơ̆ dêh char Dak Lak đei 2.646 ‘nu bơ ngai jĭ pơ lŏ lĕch đe tơ̆ 15 apŭng, thĭ xăh, plt.

Dơ̆ng: Tơ blơ̆