Năr 2/11, kiơ̆ đơ̆ng Hơnĭh tơm Dăr lăng hơlen jĭ jăn (CDC) dêh char Đắk Lắk tơroi, lơ̆m dêh char ‘nao đei mĭnh ‘nu kon pơlei ƀô̆h jĭ pơ’ngĕh brê tơblêu tơblao lơ̆m hơkau lăp đơ̆ng rŏng brŏk vĭh năm tơmang tơ̆ Nam Phi.

Dơnŏ anĭh vei lăng jang pơgang Đắk Lắk hlôi pơjing hơnĭh ming hơmet jĭ chŭ hle tơ̆ Hnam pơgang tơm Tơring Tây Nguyên

Bơngai jĭ au ‘nŏh hơnăn sư N.V.P, rơneh sơnăm 1963, oei tơ̆ koeng kơphô̆ 2, thĭ trân Quảng Phú, apŭng Cư M’gar, dêh char Đắk Lắk. Kiơ̆ đơ̆ng ƀok P. tơroi, năr 19/10/2022, ƀok hao gre păr đơ̆ng Việt Nam năm tơ̆ tĕh đak Nam Phi chă tơmang pơ hiơ̆.Lơ̆m khei ‘năr tơmang pơ hiơ̆ ƀok chă yak lơ tơring păng tơƀơ̆p, pơma dơnŭh, rôp ti hăm lơ bơngai. Năr 26/10, ƀok P. Hao gre păr brŏk vĭh tơ̆ Việt Nam (cham gre păr Nội Bài) đei pơdơ̆h jơ̆ng tơ̆ cham gre păr Singapore, đơ̆ng rŏng ‘nŏh hao gre păr brŏk vĭh tơ̆ dêh char Đắk Lắk. Trŭh năr 01/11, ƀok jĭ hơ ơ̆m hơ ăm jơ̆p lơ̆m hơkau păng đei ƀô̆h tơ ‘ngĕh tơblêu tơblao ƀrê tơ̆ klak păng kơdŭ rŏng, ƀok hlôi năm tơroi tơbăt tơ̆ hơnih jang pơgang. Đơ̆ng năr 26/10 trŭh dang ei ƀok P. Đei tơƀơ̆p hăm rim bơngai lơ̆m ŭnh hnam păng bơngai koeng ƀôt. Dôm bơngai oei tơjê̆ ƀok P., dang ei tim mă ƀô̆h đei jĭ yă kiơ ră, păng jei tŏk bŏk ăn oei hơdrô̆ lơ̆m hnam. Dơnŏ anĭh jang Pơgang Dắk Lắk hlôi iŏk đŭh jĭ kơ ƀok P. pơtrŭh ăn Dơnŏ anĭh chă tơchĕng hơlen Pơrang jĭ Tây Nguyên khăm hơlen.

Dơnŏ anĭh vei lăng jang pơgang Đắk Lắk jei hlôi Chĭh pơtrŭh hla bơar pơrô̆ rim tơdrong jang tang găn jĭ chu hle; Vei kơ jăp rim khul iung jang tĕnh koăng tơ̆ rim hơnĭh păng rim hnam pơgang tơm, hnam pơgang apŭng, thĭ xah, pơlei tơm; Tơlĕch jang kiơ̆ trong jang tang găn jĭ chŭ hle tơ̆ tơring; atŏk kơtang bơ̆ jang pơtho tơbăt, pơrô̆ hơvơn vang iung jang tang găn jĭ chŭ hle păng iung jang hơdoi hăm rim hơnĭh bơ̆ jang ƀơm trŭh vă iung jang tĕnh koăng, ư̆h kơlê̆ pơrang jĭ tơpoh lang sălơ̆m kon pơlei.