VOV4.Bahnar - Kiơ̆ đơ̆ng Hơnih tơm Dăr lăng jĭ jăn (CDC) dêh char Dak Lăk, năr 9/8, lơ̆m dêh char đei bơngai mă 3 lôch kơ yuơ jĭ pơlŏ lĕch đe, jô̆ đơ̆ng blŭng sơnăm trŭh dang ei. Bơngai jĭ rơnĕh sơnăm 1971, oei tơ̆ phương Ea Tam, pơlei tơm Buôn Ma Thuột.

Kon pơlei dăh hơnơ̆ng pơlôch klanh vă tang găn jĭ pơlŏ lĕch đe

Kiơ̆ đơ̆ng ŭnh hnam, năr 27/7, bơngai ji au chĕp pơgrŭn, jĭ kơ̆l, hơ âm hơ ăm lơ̆m akau, chă pơyơ̆ng chrŏh hlôi hơmet hăm pơgang mă lei ư̆h kơ dă ƀiơ̆. Trŭh năr  01/8, ŭnh hnam chơ ba năm tơ̆ Hnam pơgang tơm tơring Tây Nguyên hăm khăm hơlen akhan jĭ pơlŏ lĕch đe Dengue năr mă 5 đei hloi jĭ rơka klơm siêu vi B. Trŭh năr 03/8, kơ yuơ jĭ ăl, bơngai jĭ đei chơ ba ming hơmet tơ̆ Hnam pơgang Chợ Rẫy. Bơngai jĭ lôch ƀơ̆t năr 7/8.’Ngoăih 3 ‘nu bơngai lôch, jô̆ trŭh năr 9/8, dêh char Dak Lăk đei 2.970 ‘nu bơngai jĭ pơlŏ lĕch đe, lơ hlŏh 5 ‘măng pơtêng hăm khei au sơnăm sơ̆.

Tơblơ̆ nơ̆r: Amazưt