VOV4.Bahnar - ‘Năr 12/8, kiơ̆ tơ roi tơ băt đơ̆ng Anih vei lăng tơ drong jĭ jăn (CDC) dêh char Dak Lak, lơ̆m tơ ring ‘nao chih iŏk tơ til 2 ‘nu bơ ngai jĭ lôch yua đơ̆ng jĭ pơ lŏ lĕch đe. ‘Nâu jĭ bơ ngai lôch mă 4 păng mă 5 yua kơ jĭ pơ lŏ lĕch đe lơ̆m dêh char. Bơ ngai jĭ ‘nao lôch yua kơ jĭ pơ lŏ lĕch đe tơ̆ Thị trấn Ea Đrăng, apŭng Ea H’Leo, dêh char Dak Lak.

Hơ met jĭ pơ lŏ lĕch đe tơ̆ Hnam pơ gang Đa khoa tơ ring Tây Nguyên

Hơ drol ‘noh, ‘năr 10/8, Dak Lak đei bơ ngai jĭ pơ lŏ lĕch đe mă 4 lôch, oei tơ̆ tổ dân phố 4, phường Tân An, pơ lei tơm Buôn Ma Thuột, dêh char Dak Lak. ‘Ngoăih 5 ‘nu lôch, jô̆ truh ‘năr 12/8, lơ̆m dêh char Dak Lak hlôi chih iŏk vă jê̆ 3.200 ‘nu jĭ pơ lŏ lĕch đe tơ̆ 15 apŭng, thị xã, pơ lei tơm, tŏk hloh 5 ‘măng pơ têng hăm khei ‘nâu sơ năm sơ̆.

Thuem: Tơ blơ̆