Bơngai jĭ rơneh sơnăm 2013, oei tơ̆ phường Thành Công, pơlei tơm Buôn Ma Thuột, dêh char Đắk Lắk. Kiơ̆ kơ ŭnh hnam bơngai jĭ, ‘năr 10/8, bơngai jĭ đei dôm tơdrong jĭ yuh dêh hơnơ̆ng, lap lơ păng đei bơngai lơ̆m ŭnh hnam ăn huch pơgang tơ jur yuh mă lei jĭ ưh kơ dă ƀiơ̆ kơna ba năm tơ̆ Hnam pơgang hơmet hơioh jĭ Đức Tâm hơmet.

‘Năr 14/8, jĭ đei ƀôh dêh kơna đei chơ năm tơ̆ Hnam pơgang Đa khoa tơring Tây Nguyên hơmet hăm hơlen lăng jĭ pơlŏ lĕch đe Dengue. ‘Năr 15/8 jĭ đei ƀôh ăl păng bơngai jĭ lôch. Lăp đơ̆ng rŏng kơ đei bơngai lôch yua đơ̆ng jĭ pơlŏ lĕch đe, CDC hlôi jang hơdai hăm Hnam pơgang pơlei tơm Buôn Ma Thuột tơlĕch dôm trong jang dăr hơlen, hơmet ‘lơ̆ng rơgoh cham char, pơgơ̆r pruih pơgang pơlôch mur tơ̆ tơring đei bơngai jĭ. Đơ̆ng blŭng sơnăm 2024 truh dang ei, dêh char Đắk Lắk đei 1.453 ‘nu bơngai jĭ pơlŏ lĕch đe, lơ̆m noh đei 1 ‘nu lôch.