VOV4.Bahnar - Kiơ̆ kơ sô̆ chih jô̆ đơ̆ng Anih vei lăng tơ drong jĭ jăn dêh char Dak Lak, đơ̆ng blŭng sơ năm truh ‘năr 31/7, Dak Lak đei 2.451 ‘nu bơ ngai jĭ pơ lŏ lĕch đe, tŏk 5,1 ‘măng pơ têng hăm khei âu sơ năm 2021, đei 1 ‘nu bơ ngai lôch. Lơ̆m nŏh, apŭng Ea Súp đei bơ ngai jĭ pơ lŏ lĕch đe lơ hlŏh hăm 297 ‘nu, đơ̆ng rŏng kơ ‘nŏh jĭ apŭng Krông Pach hăm 267 ‘nu, plt Buôn Ma Thuột 258 ‘nu păng apŭng Buôn Đôn 214 ‘nu.

Bơ ngai jĭ pơ lŏ lĕch đe oei hơ met tơ̆ Hnam pơ gang

Dang ei 15 apŭng, thĭ xăh, plt lơ̆m dêh char đei 140 anih đei jĭ pơ lŏ lĕch đe. Khul jang pơ gang hlôi pruih pơ gang pơ lôch pơ rang jĭ, hơ met rơ gŏh cham char. Anih jang pơ gang tơ dra, jĭ pơ lŏ lĕch đe đei dêh hlŏh lơ̆m khei 8/2022 âu. Yă Ngô Thị Minh Trinh, Phŏ Kơ dră vei lăng kon pơ lei apŭng Krông Pach ăn tơ băt: Apŭng pơ tho ăn dôm khul jang pơ gang păng dôm tơ ring krao hơ vơn kon pơ lei tep chô̆ kơ mŭng, pơ lôch klanh, hơ met rơ gŏh cham char vă găn ƀiơ̆ tơ drong jĭ tơ pŏh.

Dơ̆ng: Tơ blơ̆