Kơsô̆ bơngai pơlŏ tŏ lĕch đe adoi ƀôh tŏk lơ. Anih jang pơgang hơmet jĭ jăn Đak Lăk tŏk bŏk chă hơlen dôm tơring hơbuh pơlŏ tŏ lĕch đe păng hơtŏk tơroi tơbăt gah trong tang găn păng hơmet tơdrong jĭ âu. Kiơ̆ Anih jang hơlen tơdrong jĭ jăn dêh char Đak Lăk, đơ̆ng blŭng sơnăm truh dang ei, jơ̆p dêh char băt đei jê̆ 4.400 ‘nu bơngai ƀơm pơlŏ tŏ lĕch đe, lơ̆m noh đei 2 ‘nu lôch.

Kơsô̆ bơngai ƀơm jĭ akŏm mă lơ lơ̆m khei 8 păng khei 9 hăm jê̆ 4.000 ‘nu bơngai. Pơlei tơm Buôn Ma Thuột păng apŭng Cư M’gar ‘noh 2 tơring đei kơsô̆ bơngai ƀơm pơlŏ tŏ lĕch đe lơ hloh. Hăm tơdrong hơbuh hli hlơt đơ̆ng pơlŏ tŏ lĕch đe, anih jang pơgang hơmet jĭ jăn Đak Lăk hlôi hơtŏk kơtang tơdrong jang hadoi hăm dôm anih jang, rim tơring chă hơlen pruih pơgang brai pơnhŭl tơ̆ dôm anih hơbuh pơrang jĭ; hơmet pơ-‘lơ̆ng Jơnŭm pơgơ̆r jang tang găn păng hơmet pơrang jĭ păng hơtŏk chă hơlen tơ̆ dôm tơring hơbuh pơrang vă tơtom pơgơ̆r hơmet ming.